Skema e re, s’ka më para në dorë për pensionistët
Paratë e pensioneve dhe të ndihmës ekonomike do ndahen vetëm në bankë. Përjashtohen sportelet e postës. Çfarë propozon Banka Botërore dhe Banka e Shqipërisë
Pensionet dhe ndihma ekonomike, dy ndër pagesat më të mëdha të qeverisë, duhet të kalojnë nëpërmjet bankës.
Banka Botërore i ka propozuar zyrtarisht qeverisë dhe Bankës së Shqipërisë ndryshimin e skemës, duke i dërguar këto pagesa drejt bankës. Aktualisht, vetëm rreth 50 mijë nga rreth 650 mijë pensionistë e tërheqin pensionin në bankë. Ndërsa për ndihmën ekonomike, shifra është afër zeros. Këto dy pagesa kalojnë mbi 1 miliard USD gjatë një viti, duke qenë gati 25% e të gjitha pagesave që bën qeveria. Ndryshe nga pagat a administratës, të cilat prej më shumë se 10 vitesh kalojnë me detyrim në bankë, pensionet vazhdojnë të ndahen nga posta. Pandemia e fundit tregoi qartë se pensionet në postë janë një problem i madh. Radhët në sportele pamundësuan tërheqjen në kohë të shumave të pensionit dhe rrezikuan ndjeshëm infektimin e pensionistëve. Eskperti i Bankës Botërore, në takimin e fundit të Komitetit Kombëtar të Sistemit të Pagesave, ( një komitet i nivelit të lartë ku marrin pjesë Guvernatori dhe ministrja e Financave), propozoi ndërhyrje në kuadër të automatizimit dhe dixhitalizimit. "Gjetjet dhe rekomandimet kryesore të tij u fokusuan në sektorin e pagave të institucioneve publike, pensionet dhe ndihmat sociale. Në këtë linjë, theksohet si i nevojshëm kanalizimi i këtyre pagesave nëpërmjet bankave, si dhe analizimi i mundësive për kanalizimin e pagesave të Institucionit të Sigurimeve Shoqërore nëpërmjet sistemeve të pagesave të operuara nga Banka e Shqipërisë, me qëllim optimizimin e proceseve dhe reduktimin e përdorimit të parasë fizike", thuhet në njoftimin për takimin. Por edhe vetë Banka e Shqipërisë, në "Strategjinë kombëtare për pagesat me vlerë të vogël" parashikon kalimin e pensioneve në bankë. Në raport thuhet se nga të gjitha pagesat e ISSH- së, pensionet e pleqërisë kanë vëllimin më të madh dhe disbursohen thuajse tërësisht në para fizike në sportelet e Postës Shqiptare. Sipas bankës, vitet e fundit janë bërë përpjekje për t'i kanalizuar pensionet nëpërmjet mjeteve elektronike në sistemin bankar. "Llogaritë bankare ' bazë' do të përdoren për disbursimin e pensioneve dhe programeve të mirëqenies sociale në periudhën afatshkurtër. Llogaritë e parave elektronike do të përdoren gjithashtu në afat të mesëm, sapo të bëhen ndërvepruese me llogaritë bankare. Kalimi i shpërndarjes së këtyre programeve nëpërmjet llogarive është më kompleks se pagesat e tjera qeveritare ( p. sh. pagat), për shkak të të ardhurave të ulëta të përfituesve, zotërimit të ulët të llogarive dhe niveleve më të ulëta të kulturës financiare dhe dixhitale." Por banka ka edhe zgjidhjen sociale. Kuptohet që, pensionistët për të kaluar pensionin në bankë duhet të kenë sa më pak kosto. Dokumenti parashikon disa lehtësi. "Llogaritë bankare ' bazë' do të përdoren në periudhën afatshkurtër; do të ofrohen me pak ose pa kosto për përfituesin dhe ky i fundit duhet të ketë mundësi të zgjedhë bankën që preferon. Llogaritë e parave elektronike do të përdoren gjithashtu së bashku me llogaritë bankare, pasi të jenë bërë ndërvepruese", parashikon Banka e Shqipërisë.