Shtohen rastet e reja, bie numri i shtrimeve në spital
Ministria: Pjesa më e madhe në Tiranë. Në spital, 19 të shtruar
Shtohen rastet e reja më koronavirus. Vetëm përgjatë 24 orëve të fundit janë konfirmuar 18 persona pozitivë me COVID- 19.
Rritja e kurbës vjen thuajse pas një jave me numër të reduktuar rastesh të reja. Në tri ditët e fundit, shifrat ishin të njëjta, vetëm 4 raste u shënuan të hënën dhe po kaq të martën dhe të mërkurën. Ndërkohë që dje, shifrat janë rritur me disa herë. Qytetet problematike vijojnë të jenë Tirana dhe Kruja, të cilat dje kanë regjistruar edhe numrin më të madh të rasteve. Riaktivizim të vatrës ka pasur edhe në qytetin bregdetar të Durrësit, ku dje është regjistruar një rast i ri duke e çuar në 2 numrin e të infektuarve në këtë qytet. “Në 24 orët të fundit janë testuar 191 qytetarë të dyshuar si të prekur me COVID- 19 dhe kanë rezultuar pozitivë 18 qytetarë. Pjesa më e madhe e tyre janë kontakte të rasteve të mëparshme, ndërkohë që vazhdon hetimi epidemiologjik në terren. Rastet e 24 orëve të fundit janë të shpërndara si vijon: 11 raste në Tiranë, 4 në Krujë, 2 në Berat dhe 1 në Durrës. Të shëruar janë 6 qytetarë”, tha përfaqësuesja e Task- Forcës, Eugena Tomini. Në mesin e të infektuarve janë edhe dy gra shtatzëna. Tomini tha se nga fillimi i epidemisë janë konfirmuar 6 gra të prekura nga COVID19. “Që nga fillimi i epidemisë deri në këto momente kemi në total 6 gra shtatzëna të konfirmuara me COVID- 19. Aktualisht 4 prej tyre janë të shëruara”.
RASTET AKTIVE Nga 898 qytetarë të prekur, 695 e kanë fituar betejën me këtë sëmundje duke rezultuar negativë në dy testet që kanë kryer pas periudhës 14- ditore. Ministria ka bërë me dije dje se rastet e reja në pjesën më të madhe kanë lidhje me rastet e mëparshme. “Pavarësisht numrit të rasteve pozitive të identifikuara, situata epidemiologjike paraqitet e qëndrueshme, por që tregon qartë se kujdesi i qytetarëve duhet të vazhdojë, për të respektuar masat e vendosura, në mënyrë që të minimizojmë sa më shumë përhapjen e virusit te kontaktet familjare apo më gjerë. Deri më sot janë konfirmuar pozitivë me COVID- 19 në të gjithë vendin 898 qytetarë, ndërsa 77% e të prekurve tashmë janë të shëruar. Në të gjithë vendin, aktualisht janë 173 persona aktivë me COVID- 19, kryesisht në Tiranë, Krujë, Shkodër, Kamëz”. SITUATA NË SPITAL Sipas të dhënave zyrtare më pak se 11% e te prekurve aktivë po marrin trajtim në spitalet COVID, pjesa tjetër ndiqet nga mjeku i familjes. ” Situata në spitale paraqitet e qëndrueshme prej ditësh. Aktualisht në dy spitalet COVID janë të shtruar 19 pacientë dhe vetëm 3 prej tyre janë në terapi intensive. Rastet e sotme pozitive janë tregues se funksionimi i strategjisë së rihapjes dhe e lehtësimit të masave varet vetëm nga ju. Nëse ju do të tregoheni të përgjegjshëm, duke respektuar distancimin fizik, të kombinuar me masat e higjienës respiratore dhe personale, të mos kryeni vizita te të afërmit për çdo lloj arsyeje, bizneset të zbatojnë protokollet strikte, do të vijojmë me një situatë epidemiologjike nën kontroll”, vuri në dukje Tomini. Të hënën, pra në datë 18 maj është parashikuar që të hapen restorantet dhe baret. Ministrja e Shëndetësisë, Ogerta Manastirliu, paralajmëroi edhe mbylljen e spitalit COVID- 2, si dhe rifillimin e operacioneve të planifikuara, të cilat u pezulluan për më shumë se 2 muaj, për shkak të situatës së krijuar nga epidemia.