Lëvizje tek opozita, Murrizi në vend të Hajdarit
Priten ndryshime në drejtimin e komisioneve parlamentare
Opozita Parlamentare ka vijuar me lëvizjet dhe konfigurimi i grupeve parlamentare tashmë është thuajse i ndryshëm me atë të para një viti, kur PD dhe LSI u larguan dhe Kuvendi u mbush me kandidatët e listave fundore të zgjedhjeve të 2017- ës. Rudina Hajdari nuk do të jetë më kryetare e Grupit Parlamentar Demokrat. Grupi në fjalë, që deri më tani ka qenë më aktivi në të bërit opozitë nga foltorja e Kuvendit, do të drejtohet tani e tutje nga Myslim Murrizi, i cili është njëkohësisht nënkryetar i Kuvendit. Në dokumentin e siguruar nga gazeta "Panorama", thuhet se anëtarët e këtij grupi parlamentar, Myslim Murrizi, Alban Zeneli, Halit Valteri, Halil Jakimi, Korab Lita dhe Arlind Çaçani vendosën që Rudina Hajdari të mos jetë më drejtuese, por të kalojë me statusin e anëtares së thjeshtë. Ndërkohë, Fatjona Dhimitri dhe Arben Elezi nuk kanë marrë pjesë në votim. Si nga Rudina Hajdari, e larguar nga drejtimi i grupit, po ashtu edhe Myslim Murrizi, që kalon tashmë në krye të këtij grupi, nuk ka pasur deri më tani asnjë qëndrim në lidhje me këtë ndryshim. Kjo lëvizje në këtë grup, në fakt, ishte përfolur edhe në muajt e parë të këtij viti, para se të shpërthente pandemia e COVID- 19, por për shkak të ngjarjeve që pasuan në këto 3 muaj, ndryshimi u shty. Por ky ndryshim në kampin e opozitarëve të rinj nuk është i vetmi, pasi tashmë prej disa javësh është krijuar edhe një tjetër Grup Parlamentar me emrin "Demokraci dhe drejtësi". Grupi në fjalë drejtohet nga deputeti Edmond Stojku dhe aktualisht ka 11 anëtarë, duke u shndërruar në grupin parlamentar opozitar, më të madhin në Kuvend. Duke qenë se ky grup aktualisht nuk ka drejtimin e asnjë komisioni parlamentar, pritet që të ketë ndryshime edhe në drejtimin e tyre. Pritet që dy komisionet parlamentare, ai Medias dhe i Integrimit, që drejtohen nga opozitaret, Rudina Hajdari dhe Fajtona Dhimitri, të kenë ndryshime në drejtim. Përveç ndryshimeve në organizimin parlamentar, deputetët që u futën në Kuvend në pranverën e 2019- ës janë duke u organizuar edhe politikisht. Nga Ralf Gjoni dhe Myslim Murrizi, kohët e fundit janë paralajmëruar disa lëvizje të reja politike. Por, për pothuajse të gjithë zërat e fortë të opozitës parlamentare, kauza kryesore vijon të mbetet reforma në sistemin zgjedhor, për të hapur listat.