Balla: Është kusht për konferencën e parë ndërministrore Shqipëri- BE

Nga foltorja e Kuvendit, kryetari i Grupit Parlamentar të Partisë Socialiste, Taulant Balla, deklaroi se Reforma Zgjedhore do duhet të përfundohet brenda muajit qershor, pasi është një kusht për të zhvilluar konferencën e parë ndërministrore Shqipëri- BE në kuadër të negociatave të anëtarësimit. Balla deklaroi se kërkesat e opozitës jashtëparlamentare në lidhje me përbërjen e Kolegjit Zgjedhor dhe reformën janë absurde. "Kemi rënë dakord dhe i ofruam opozitës parlamentare një karrige dhe një përfaqësues në Komisionin e Posaçëm të Reformës Zgjedhore. Nuk duhet ta harrojmë që vendimmarrja i takon Kuvendit të Shqipërisë. Zgjedhjet e vitit 2021 në Shqipëri duhet të zhvillohen domosdoshmërisht me komisionerë jopartiakë. Një praktikë staliniste, që partitë votohen dhe partitë numërojnë votat. Votat do t'i numërojnë njerëz që nuk kanë lidhje me politikën. Opozita joparlamentare ndodhet sot në pikën më të zezë dhe të vështirë; është qasja ndaj përbërjes së Kolegjit Zgjedhor. Unë nuk e kuptoj se kush i këshillon e kush ua jep këto ide. Të vazhdosh të kërkosh që të jesh anëtar i Kolegjit Zgjedhor të jesh gjyqtar që nuk ke kaluar vetingun, vetëm PD mund t'i vendosë këto kushte. Thirrja ime për kolegët deputetë është: Vazhdoni punën në Komisionin e Posaçëm të Reformës Zgjedhore dhe t'u përmbahemi afateve. Ne duhet domosdoshmërisht që brenda muajit qershor ta kemi votuar Reformën Zgjedhore, sepse e kemi një kusht për të zhvilluar konferencën e parë ndërministrore Shqipëri- BE", u shpreh Balla.