OFL rikthehet në Tiranë, u dërgon letër tre "të fortëve"

TIRANE - Operacioni Forca e Ligjit është rikthyer në Tiranë, ku u ka kërkuar të justifikojnë brenda 48 orëve, pasuritë e tyre tre personave, të cilët janë pjesë e ligjit special. OFL i ka dërguar letër për deklarim pasurie Denis Qordjas, Fatjon Manabejt dhe Shkëlqim Sharrës. Burime nga Policia thanë se të tre këta persona janë emra të njohur, pasi Denis Qordja ka vuajtur dënimet nën akuzën e trafikut të prostitucionit, Fotjon Manabej është shpallur në kërkim ndërkombëtar nga Interpol Roma, ndërsa është dënuar më 8 shtator të vitit 2007 nga Gjykata e Aleksandrisë me 5 vjet e 3 muaj burg. Ndërsa Shkëlqim Sharra është dënuar për trafik ndërkombëtar droge dhe është arrestuar më herët në Shkodër, pasi në makinë i janë gjetur 16 kg marijuanë. "Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve: D. Q., F. M. dhe L. D., banues në Tiranë. Këta individë, si subjekt i Ligjit Special, duhet t'u përgjigjen me shkrim, brenda 48 orësh, të gjitha pyetjeve të OFL- së dhe më pas, përgjigjet e marra do t'i dërgohen SPAK- ut, për veprime të mëtejshme. OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special. OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë", tha zyrtarisht Policia e Shtetit.