Apeli vulos çështjen ndaj Bashës, pushohen hetimet

Çështja u pushua më herët edhe nga Gjykata e Shkallës së Parë

Gjykata e Apelit të Tiranës la në fuqi vendimin e Shkallës së Parë për pushimin e akuzës së "Falsifikimit të dokumenteve" ndaj kreut të PD- së, Lulzim Basha, dhe dy funksionarëve të kësaj partie. Vendimi është dhënë ditën e djeshme, në një seancë të bërë nga gjyqtarët e Apelit në dhomë këshillimi. Pala akuzuese mësohet se nuk kishte paraqitur në seancën e djeshme asnjë provë të re për akuzat e ngritura ndaj Bashës, Arben Ristanit dhe Ilir Dervishit. Më herët, Gjykata e Shkallës së Parë e rrëzoi këtë akuzë, duke argumentuar se nuk ka elementë të veprës penale, çka bëri më pas që ky vendim të ankimohej në Apel. Prokuroria e ankimoi vendimin e Shkallës së Parë, duke e akuzuar Bashën për falsifikim formularësh, pasi dyshohej se kishte fshehur dy pagesa të kryera në SHBA për lobim dhe madje edhe një lidhje me Nik Muzin, por nuk u gjetën prova, prandaj edhe akuzat ranë. Tashmë, Basha është shpallur i pafajshëm me vendimin e dhënë nga Apeli i Tiranës. Kujtojmë se hetimet për rastin nisën dhe për akuzën e "Pastrimit të parave", por në njoftimin e akuzës, Prokuroria shkruante se pas hetimeve kjo akuzë rezultoi e paprovuar. "Dërgimin në gjyq të çështjes nr. 645 të vitit 2018 me të pandehur Lulzim Basha, Arben Ristani dhe Ilir Dervishi, akuzuar për veprën penale të ' Falsifikimi i vulave, i stampave ose i formularëve', të parashikuar nga neni 190/ 3 të Kodit Penal", shkruhej në njoftim. Duke iu referuar dokumentit të Prokurorisë, akuza për "Pastrim parash" nuk vërtetohej dhe duke iu referuar nenit 328/ 1 të cituar, "fakti penal, për të cilin është hetuar, nuk ekziston". Por kundër këtij vendimi të dy kolegëve të tij, ka qenë prokurori Kolë Hysenaj, që ka kërkuar hetime shtesë dhe marrjen e dëshmisë së shtetasit amerikan Nik Muzin dhe hetime të mëtejshme për akuzën e "Pastrimit të parave". Hetimet për Lulzim Bashën, Arben Ristanin dhe Ilir Dervishin nisën për shkak të shpenzimit prej Partisë Demokratike të disa mijëra dollarëve për lobim në Shtetet e Bashkuara të Amerikës, gjatë vitit 2017. Pati dyshime se këto para nuk ishin deklaruar si shpenzime në bilancin që partia kishte dorëzuar në Komisionin Qendror të Zgjedhjeve.