SPAK së shpejti me 3 anëtarë të rinj, 4 kandidatë në garë
Më 18 maj do të intervistohen 4 prokurorët që shprehën interes
Këshilli i Lartë i Prokurorisë njoftoi se ka përfunduar fazën e verifikimeve për katër prokurorët që kanë shprehur interes për të qenë pjesë e Strukturës së Posaçme Antikorrupsion dhe në datën 18 maj do të zhvillojnë intervistat.
Kandidatët për Prokurorinë e Posaçme janë Dorina Bejko, Dritan Prençi, Sotir Kllapi dhe Vladimir Mara, të cilët do të dalin njëri pas tjetrit para anëtarëve të KLP. Kujtojmë se Dritan Prençi dhe Vladimir Mara kanë qenë më herët pjesë e kandidatëve që janë intervistuar për të qenë pjesë e SPAK, por nuk arritën të ishin në listën e 15 më të mirëve.
VLERËSIMI
Kandidatët për në SPAK do të renditen në bazë të një sistemi pikëzimi, i cili do të bazohet në performancën etike dhe profesionale të tyre. Kështu, referuar rregullores, kriteret e posaçme etike dhe profesionale për ngritjen në detyrë si Prokuror i Posaçëm janë: së pari aftësitë e treguara në hetim, përfshirë përdorimin e teknikave të posaçme të hetimit dhe qasjen proaktive te hetimi, në ndjekjen penale, përfshirë formulimin e akuzës dhe përfaqësimin në Gjykatë dhe në konfiskimin e produkteve të veprës penale dhe të aseteve, sipas Kodit të Procedurës Penale ose ligjit antimafia. Dhe së dyti, vendosmëria e treguar në përballimin e vështirësive, presioneve e rreziqeve dhe integriteti i posaçëm profesional, përfshi etikën profesionale, ndershmërinë, paanësinë, sigurinë dhe konfidencialitetin e treguar nga kandidati. Kandidatët, pas vlerësimit tërësor të dy kritereve, etik dhe profesional, do të renditen në kualifikim të lartë, të mesëm dhe të ulët.
KANDIDATËT
Prokurorja e Prokurorisë së Pogradecit, Dorina Bejko, është kandidatja e parë që do të dalë para anëtarëve të Këshillit të Lartë të Prokurorisë. Bejko ka kandiduar dhe më herët për të qenë pjesë e SPAK. Dritan Prençi, më herët prokuror në Prokurorinë për Krime të Rënda, aktualisht i komanduar në SPAK për një vit, kërkon të jetë pjesë e saj me mandat të plot. Prençi ka pasur në duar dosje të rëndësishme, që janë duke vazhduar në hetim edhe në Prokurorinë e Posaçme. Sotir Kllapi është kandidati tjetër për SPAK, që do të intervistohet i treti në radhë. Kllapi është prokuror në Prokurorinë e Pogradecit, ndërsa ka kaluar procesin e vetingut në të dyja shkallët. Vladimir Mara do të jetë i fundit që do të dalë para anëtarëve të Këshillit të Lartë të Prokurorisë, ndërsa kjo nuk është hera e parë, pasi më herët ka kandiduar për të qenë pjesë e SPAK. Mara aktualisht është i komanduar për një periudhë 1- vjeçare në Prokurorinë e Posaçme, ndërsa ka në duar dosje të rëndësishme.
SPAK
Struktura e Posaçme Antikorrupsion, e njohur gjerësisht si SPAK, do të jetë e specializuar për hetimin e korrupsionit dhe krimit të organizuar. Prandaj edhe një nga kriteret e parashikuara në ligj për anëtarin e Prokurorisë së Posaçme, është eksperienca në hetimet për krimin e organizuar dhe korrupsionit. Ndërkohë, ngritja e SPAK do shkrijë Gjykatën për Krime të Rënda dhe një pjesë të kompetencave të kësaj të fundit u kaluan gjykatave në rrethe. Struktura e Posaçme do të ketë në varësinë e saj edhe Byronë Kombëtare të Hetimit, që është njësi speciale, e ngjashme me FBI- në amerikane. Aktualisht, SPAK është duke përzgjedhur drejtuesin e Byrosë Kombëtare të Hetimit dhe pas përzgjedhjes së tij do të nisë puna për rekrutimin e hetuesve, që do të kenë mundësinë të trajnohen në akademinë e FBI- së në Virxhinia të Shteteve të Bashkuara të Amerikës.