Rastet pozitive me COVID, Shulku: Karantinohet vetëm... individi

Federata Shqiptare e Futbollit ka përcaktuar edhe datat për rifillimin e kampionatit në Kategorinë Superiore dhe Kategorinë e Parë. Pas dy takimeve në nivel ekspertësh, ku është propozuar dhe diskutuar mbi protokollin sanitar të masave, qeveria e futbollit vendoi datat 3 dhe 7 qershor për dy kampionatet. Mirëpo, çështje e shumë diskutuar është testimi apo jo i futbollistëve dhe stafeve të klubeve. Për këtë, sekretari i përgjithshëm i FSHF- së ka shpjeguar se është gjetur dakordësia me Ministrinë e Shëndetësisë se si do të veprohet për të kontrolluar sportistët dhe stafet e klubeve. "Nuk besoj se protokolli ynë do të refuzohet, pas takimeve që ne kemi zhvilluar me përfaqësues të Ministrisë së Shëndetësisë. Shpresoj se do të kemi një reagim pozitiv dhe jo refuzim. Në bisedë është rënë dakord për të gjitha pikat e protokollit sanitar. Është rënë dakord që para seancave stërvitore dhe ndeshjeve, lojtarëve dhe stafit do t'u matet temperatura dhe nëse dikush do të shfaqë simptoma, atëherë do t'i nënshtrohet tamponit. Nëse një futbollist do të rezultojë pozitiv me koronavirus, ai do të karantinohet, ndërsa ekipi do të vazhdojë. Ekipit do t'i bëhen tamponët dhe nëse do të jenë negativë, do të vazhdojnë ndeshjen", u shpreh Ilir Shulku për "A2 CNN".