Prapaskenat e vendimit për shembjen e Teatrit, peticioni i aktorëve: Mjaft 50 vjet në atë karakatinë
Zbardhen email- et kontradiktore, që nxituan në votimin e vendimit nga të majtët. Puna për shembjen e Teatrit nis pas dhjetë ditësh
Fati i ndërtesës më të vjetër e të rëndësishme kulturore në Shqipëri, Teatrit Kombëtar, është caktuar me email.
Gjashtëdhjetë anëtarët e Këshillit Bashkiak, që gjithashtu do të hyjnë në histori, nga shtëpitë e tyre, me një "klik" dhanë votën pro shembjes së ndërtesës historike, për të ndërtuar në vend të saj një të re. Pas gati tri vitesh përpjekje të artistëve për ta mbajtur me thonj shtëpinë e tyre, në vetëm tri ditë, bashkia gjeti mënyrën më kontradiktore të mundshme për të kaluar vendimin. Përmes postës elektronike, pa asnjë debat, qoftë edhe formal, këshilltarët janë nxitur të japin "OK" në vetëm një orë, përpara datës së caktuar nga vetë këshilli. Ndërsa shqyrtimi në komision rezulton të jetë kryer përpara se ata të njihen me projektvendimin në fjalë.
LOJA ME VENDIMIN
Mëngjesin e së mërkurës, më 13 maj, të 61 anëtarët e Këshillit Bashkiak u thirrën për mbledhjen e radhës përmes një email- i me dy projektvendime, që kishin të bënin me prishjen e dy objekteve që u dëmtuan nga tërmeti dhe një korrigjim gabimi në një vendim të mëparshëm. Bashkë me to edhe datat e diskutimit në komisionet përkatëse dhe ditën e votimit. "Në datën 15 maj, ju lutemi të dërgoni elektronkisht votën tuaj për projektvendimet e mësipërme", citohet në njoftim. Asgjë për Teatrin. Ashtu siç ndodh rëndom, mëngjesin e një dite më pas në inbox- in e këshilltarëve mësohet të kenë arritur dy projektvendime të tjera shtesë ( faximilet përbri shkrimit). Pikërisht aty, mes rreshtash, lexohet vendimi për të miratuar ekspertizën e para 2 viteve nga instituti i ndërtimit që sugjeron prishjen e Teatrit Kombëtar. Me njoftimin e dytë nga këshilli, më 14 maj, anëtarët njoftohen edhe një herë se duhet të votojnë të nesërmen, më 15 maj në orën 12: 00 vendimet shtesë, pasi të ketë kaluar nga Komisioni i Kulturës. Rrjedha normale e ngjarjes prishet nga një njoftim i beftë pak pas mesditës së të enjtes. Bashkia u kërkon me nxitim këshilltarëve të majtë të shprehin vullnetin e tyre përpara datës e orës së përcaktuar, po përmes email- it, pasi u bën me dije se projektvendimet ishin ezauruar si çështje në komisionet përkatëse. "Keni në dispozicion 1( një) orë për shqyrtim të këtyre materialeve, me qëllim votimin elektronik ( Pro/ Kundra/ Abstenim)".
VOTIMI ME E- MAIL
Të gjashtëdhjetë anëtarët e majtë të Këshillit Bashkiak i janë bindur shpejt "urdhrit" për të votuar pro vendimit për prishjen e Teatrit, ndërkohë që nga ana tjetër u zbulua se plani për të riun ishte gati. Kështu, gjithçka u mbyll brenda datës 14 maj dhe u bë publike në mesnatë. "Lali Eri nuk paska duruar as të vinte data 15 maj. Mbledhja është mbyllur sapo në adresën e- mail të sekretarisë së Këshillit Bashkiak kishin dërguar votën e tyre pro vendimit për prishjen e Teatrit Kombëtar, 60 këshilltarë. Arsyetimi se i kanë të gjitha votat ndaj dhe mund të bëjnë ç'të duan është sa banal, antiligjor, aq edhe i frikshëm", thotë i vetmi këshilltar opozitar, Fabian Topollaj teksa shton se qartazi kemi të bëjmë me një mbledhje të manipuluar. Të kundërtën pretendon Plarent Ndreca, një prej anëtarëve që deklaron votën e tij pro shembjes. "Ne na është çuar email dhe kemi dhënë votën në momentin që është nisur ai", shprehet Ndreca, i pyetur nga "Panorama". Sipas tij, çështja ka kaluar në komisione. Për më tepër, çështja nuk ka kaluar pa debate, sipas tij, pasi janë ftuar edhe ekspertë dhe drejtorë të bashkisë, emrat e të cilëve nuk bëhen të ditur.
KUR DO PRISHET TEATRI
Edhe pse vendimi është marrë tashmë, do të duhen të paktën dhjetë ditë që ruspat e bashkisë t'i mësyjnë
Teatrit Kombëtar. Këtë e thotë Ligji për vetëqeverisjen vendore në pikën 6 të nenit 55 të tij. "Aktet e këshillit shpallen brenda 10 ditëve nga data e miratimit të tyre dhe hyjnë në fuqi 10 ditë pas shpalljes. Aktet me karakter individual hyjnë në fuqi në datën e njoftimit të tyre subjekteve që përfshihen në to." Të gjitha vendimet që merr këshilli dërgohen në prefekturë për t'u sigluar, çka nënkupton zbatimin. E gjitha kjo merr disa ditë kohë. Jo më herët se dhjetë ditë pas shpalljes, Teatri Kombëtar rrezikon të bjerë. Nxitimi për të kaluar vendimin ka bërë që këshilli të shkelë rregulloren, e cila kërkon që anëtarët të njihen minimalisht pesë ditë para mbledhjes me projektvendimet që do shqyrtohen, me qëllim që të kenë kohë për t'i analizuar e debatuar. "Thirrja për mbledhjen e këshillit, bëhet nga kryetari i këshillit dhe njoftimi për mbledhjen bëhet si rregull, jo më pak se 5 ditë para datës së zhvillimit të saj. Njoftimi përmban datën e mbledhjes, orën, vendin dhe rendin e ditës", citohet në nenin 13, pika 4 e rregullores së miratuar pak kohë më parë.