Koordinim me SMS, linja e klandestinëve sirianë
Nga Korça me makina private në Tiranë, më pas drejt Malit të Zi
Oficerët e Hetimit të Trafiqeve në Policinë e Tiranës zbuluan një linjë të trafikut të klandestinëve siriane, afganë e marokenë, nga Korça në drejtim të Malit të Zi, duke vënë në pranga 4 persona.
Burime zyrtare të Policisë thanë dje se të arrestuarit janë pjesë e një grupi që koordinoheshin me mesazhe në aplikacionet "Whatsapp" dhe "Messenger", për të bërë të mundur kalimin e paligjshëm të kufirit, akomodimin e përkohshëm në kryeqytet e më pas transportin drejt kufirit me Malin e Zi. Dy prej të arrestuarve janë shtetas shqiptarë, ndërsa dy të tjerët janë të huaj, një sirian e një maroken. Nga ana tjetër, edhe tre shtetas turq janë proceduar në gjendje të lirë për kalim të paligjshëm të kufirit. Dy shtetasit e huaj që u arrestuan nga Policia e Tiranës dyshohet se kishin rolin e organizatorëve, pasi komunikonin me shtetas të tjerë të huaj në Greqi, me të cilët binin dakord për transportin, por edhe për shumën e parave që duhej të paguante secili prej personave që do të kalonte ilegalisht në vendin tonë. Destinacioni, ashtu si në shumicën e rasteve, është Bashkimi Europian.
KOORDINIMI
Seksioni për Hetimin e Trafiqeve të Paligjshme në Drejtorinë e Policisë Tiranë, në bashkëpunim me Komisariatin e Policisë Vorë dhe Seksionin për Krimet Kompjuterike në Tiranë, në bazë të informacioneve të siguruara në rrugë operative, finalizoi me sukses operacionin e koduar "BACKLASH", në kuadër të të cilit u arrestuan në flagrancë shtetasit: K. D., 32 vjeç, banues në Kamzë, Tiranë; A. M., 35 vjeç, banues në Tiranë; E. E., 22 vjeç, me shtetësi dhe kombësi siriane; A. I., 25 vjeç, me shtetësi dhe kombësi marokene. Këta shtetas, në bashkëpunim me njëri- tjetrin, dyshohet se kundrejt shpërblimit monetar bënin transportimin e emigrantëve klandestinë të kombësisë siriane ose kombësive të tjera ( marokene, afgane, irakianë) nga zona e Korçës në afërsi të kufirit të gjelbër me Greqinë, për t'i sjellë në Tiranë. Në kryeqytet, pasi sistemoheshin fillimisht në dhoma me qira apo hostele në zonën e Laprakës, transportoheshin me automjete private drejt kufirit të gjelbër me Malin e Zi, me destinacion final vendet e Bashkimit Europian. Shtetasit E. E. dhe A. I. dyshohet se kishin rolin e organizatorit në këtë skemë trafikimi, duke u koordinuar me persona të tjerë të kombësisë siriane në Greqi dhe Siri, ku nëpërmjet aplikacioneve "Whatsapp", "Messenger" etj., bënin koordinimin e lëvizjes së emigrantëve nga Greqia për në Shqipëri, duke angazhuar shtetasit shqiptarë të arrestuar në këtë skemë, të cilët luanin rolin e transportuesit, përkthyesit dhe të personave që shpesh tërhiqnin paratë që transferoheshin nëpërmjet agjencive te transfertave monetare.