Ambasadorja Kim në Kryeministri, jo takim me Ramën
Amnistia fiskale, legalizimi i kanabisit, shembja e Teatrit e Reforma në Drejtësi, në qendër të debatit
Ambasadorja e SHBA- ve në Shqipëri, Yuri Kim, zhvilloi dje një takim në Kryeministri për gati një orë, por burime pranë qeverisë thanë për “Panorama” se ajo nuk kishte takuar Kryeministrin Rama.
Dy ditë më parë, ambasadorja Kim prezantoi tri prioritetet e punës së saj. Përmes një postimi në “Twitter”, Yuri Kim tregoi se si do të arrijë përmbushjen e prioriteteve të saj në këtë detyrë. Zonja Kim shprehet se 3 prioritetet e saj janë forcimi i marrëdhënieve të mbrojtjes, mbështetje për ngritjen e funksionimin e institucioneve demokratike dhe rritja e tregtisë e investimeve. Ajo ka shtuar se të tria prioritetet kërkojnë sundim të ligjit, transparencë dhe fund të korrupsionit. “Tri prioritetet e mia janë ( 1) forcimi i marrëdhënieve të mbrojtjes, ( 2) mbështetje për ngritjen & funksionimin e institucioneve demokratike; ( 3) rritja e tregtisë & investimeve. Të tria kërkojnë sundim të ligjit, transparencë & fund të korrupsionit!”, ka shkruar ambasadorja Kim.
REFORMA Ambasadorja e SHBA në vendin tonë bëri një pozicionim të fortë në lidhje me Reformën në Drejtësi dhe veçanërisht për pavarësinë e Gjyqësorit. Në intervistën e dhënë për gazetaren Ilva Tare, në “Euronews Albania”, ambasadorja Kim i ka dhënë disa mesazhe të forta politikës dhe Gjyqësorit në Tiranë, ku në nëntekstin e gjuhës së saj diplomatike, dukej që mesazhet më të forta ishin për opozitën. “Por ajo që mund t’ju them është që për qeverinë amerikane, Reforma në Drejtësi në Shqipëri mbetet përparësi dhe, për mua personalisht, mbetet një përparësi, e kam në plan t’i kushtoj gjithçka mundem për ta bërë realitet. Do të thotë që do të ketë frustrim, e pres këtë të ndodhë, sepse ka disa që nuk duan që të ndodhë. Ka edhe çështje kapacitetesh. Por ajo që mund të them është se do të bëj përpjekjet e mia më të mira; kushdo rreth meje do të bëjë më të mirën dhe tani është në dorën e udhëheqësve politikë që të tregojnë seriozitetin e tyre për ta bërë këtë realitet”, theksoi ambasadorja Kim. Ambasadorja shpreh besim në përfundimin e Reformës Zgjedhore më 31 maj. “Unë mendoj se në vend që të përqendrohemi në çdo hap, duhet të bëjmë pak prapa dhe të shohim panoramën e plotë. Dhe në panoramën e plotë, ajo që unë shoh, është se opozita, qoftë brenda apo jashtë Parlamentit, ka pranuar të ulet në tavolinë. Është tashmë përgjegjësia e secilit në tavolinë, qofshin në pakicë apo shumicë, që të dëgjojnë idetë e njëri- tjetrit, të dëgjojnë këshillën e OSBE/ ODIHR dhe të dalin me reforma që janë vërtet kuptimplota. Kjo është pikërisht koha që duhet të tregojnë se çfarë kanë. Mendoj se gjatë 6 muajve të ardhshëm, do të ketë disa vendime të rëndësishme që do duhet të merren, disa negociata të rëndësishme që do duhet të mbyllen, përfshirë edhe Reformën Zgjedhore, dhe unë pres të shoh rezultatet. Por, është diçka e mirë që ata janë ulur në një tavolinë. Dhe mendoj se ndiejnë pak trysninë për të mbërritur në një rezultat kuptimplotë”, u shpreh ambasadorja Kim.