Vrasje, kanosje e drogë, OFL zbret në Korçë e Pogradec
Operacioni Forca e Ligjit zbriti dje në Pogradec e Korçë, ku i ka kërkuar të justifikojnë brenda 48 orëve pasuritë e tyre katër personave. OFL i ka dërguar kërkesë për deklarim pasurie Erjon Llapushit, Arben Pilinçit, Theodhor Dhamos dhe Vangjel Zgurit. Policia tha dje se në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL u ka nisur kërkesat me shkrim për vetëdeklarimin e burimeve të pasurisë, shtetasve: Erjon Llapushi, banues në Pogradec, pasi Gjykata e Shkallës së Parë për Krimet e Rënda Tiranë e ka shpallur fajtor për veprën penale "Shtrëngimi me anë të kanosjes ose dhunës për dhënien e pasurisë" e kryer në bashkëpunim; Arben Pilinçi, banues në Korçë, pasi Gjykata e Rrethit Gjyqësor Korçë e ka deklaruar fajtor për veprën penale "Vrasja kundër dy ose më shumë personave"; Theodhor Dhamo, banues në Korçë, pasi Gjykata e Rrethit Gjyqësor Korçë ka vendosur vleftësimin si të ligjshëm të arrestimit në flagrancë për kryerjen e veprës penale "Prodhimi dhe shitja e lëndëve narkotike"; Vangjel Zguri, banues në Korçë, pasi Gjykata e Lartë Tiranë e ka deklaruar fajtor për veprën penale "Prodhimi dhe shitja e lëndëve narkotike". "Këta individë, si subjekt i Ligjit Special, duhet t'u përgjigjen me shkrim, brenda 48 orësh, të gjitha pyetjeve të OFL- së dhe më pas, përgjigjet e marra do t'i dërgohen SPAK- ut për veprime të mëtejshme. OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special", tha zyrtarisht Policia.