Fier, dy persona i grabisin çantën me para postierit

Dy persona i dalin përpara dhe i grabisin një shumë të konsiderueshme parash, një punonjësi të Postës në Fier. Policia ka bërë të ditur se pas njoftimit të marrë nga punonjësi i Postës, K. Gj., se në fshatin Sulaj, dy persona të paidentifikuar i kishin marrë me dhunë çantën në të cilën kishte 150 mijë lekë të reja, menjëherë kanë shkuar në vendngjarje. Nga ndërhyrja e shpejtë u bë e mundur zbardhja e ngjarjes së ndodhur pasditen e djeshme, si dhe identifikimi i autorëve të dyshuar. Si rezultat i rrethimit të menjëhershëm të zonës, uniformat blu lokalizuan dhe kapën në flagrancë autorët e dyshuar të ngjarjes, të cilëve gjatë kontrollit iu gjet dhe iu sekuestrua edhe çanta me sasinë e lekëve që i kishin marrë me dhunë punonjësit të Postës. Në përfundim të veprimeve të kryera hetimore u bë arrestimi në flagrancë i shtetasve G. Ndreko, 35 vjeç, dhe H. Mernica, 22 vjeç, banues në Sulaj, Fier. Ndaj të dyshuarve, hetimet janë në vijim, ndërkohë që materialet iu referuan Prokurorisë së Fierit, për veprën penale "Vjedhja me dhunë, e kryer në bashkëpunim". "Shërbimet e Komisariatit të Policisë Fier, pas njoftimit të marrë nga shtetasi K. Gj. ( punonjës i Postës), se në fshatin Sulaj, 2 persona të paidentifikuar i kishin marrë me dhunë çantën, në të cilën kishte 150.000 lekë të reja, menjëherë kanë shkuar në vendngjarje. Falë mirorganizimit dhe veprimeve të shpejta e profesionale, u bë e mundur zbardhja e ngjarjes dhe identifikimi i autorëve të dyshuar. Në përfundim të veprimeve të kryera, nga specialistët për Hetimin e Krimeve në Komisariatin e Policisë Fier u bë arrestimi në flagrancë i shtetasve G. N., 35 vjeç dhe H. M., 22 vjeç, banues në Sulaj, Fier", thuhet në njoftimin e Policisë.