Pensionet, shtesa pas rillogaritjes së pagave
Nëndrejtori i ISSH sqaron efektet në pensione pas ndryshimit të koeficientëve të pagave. Shtesa e bazës, deri në 1790 lekë në muaj dhe rrogat para e pas vitit 1994
Instituti i Sigurimeve Shoqërore ka nisur të aplikojë pagat e reja për efekt të llogaritjes së pensioneve për të gjithë ata që dalin pas datës 1 prill të këtij viti.
Pas rivlerësimit të bërë me koeficientin 9.302, pagat e para 94- s, në raport me një vit më parë, kanë njohur një rritje, e cila varion nga 580 lekë deri në 1792 lekë.
EMINI
Zv. drejtori i ISSH, Ali Emini, tha se politika e indeksimit të pagave reflektohet në rritjen e masës së pensionit. "Indeksimi gjithmonë adresohet në shtim nominal të masës mujore të pensioneve të caktuara deri në datën 31.3.2020, si dhe për pensionet që do të caktohen në vazhdim, pra kur e drejta e përfitimit lind pas datës 1 prill 2020, por vetëm për atë pjesë të pensionit që emërtohet ' shuma bazë' dhe që është e barabartë me pensionin social. Indeksimi nuk efekton atë pjesë të pensionit me datë fillimi nga 1.4.2020, e cila është e lidhur me vitet e sigurimit dhe me pagën mesatare të kontributeve, thjesht sepse indeksi i çmimeve ligjërisht adresohet për indeksimin e pensioneve. Dispozitat e harmonizuara të legjislacionit të sigurimeve shoqërore vendosin detyrimin që krahas masave të indeksimit të pensionit, sipas një metodologjie të mirëpërcaktuar në nenin nr. 59 të ligjit 7703, datë 11.5.1993, i ndryshuar, të realizohet edhe aktualizimi ( indeksimi) i pagave mbi bazën e të cilave do të përllogariten pensionet e ardhshme. Për përcaktimin e koeficienteve të indeksimit të pagave kontributive, nuk është zgjedhur indeksi i çmimeve të konsumit, por është zgjedhur ecuria në vite e ngarkesës kontributive, që do të thotë një nivel më i lartë i të ardhurave kontributive kundrejt numrit të kontribuuesve, sjell efekt pozitiv në rritje të masës së pensionit të përllogaritur", ka bërë me dije Emini. Sipas tij, për pensionet që do të caktohen mbas datës 1.4.2020, pagat kontributive të të gjithë periudhës, do të rriten edhe me 2,4 %. "Gjithashtu, indeksimi i pagave kontributive, me datë fillimi në të njëjtën kohë me indeksimin e pensioneve, bëhet e mundur që të mos këtë dallime thelbësore të masës së pensioneve, me të njëjtat kushte të shumave të kontributeve te paguara dhe të viteve të sigurimit, të caktuara përpara dhe pas datës 1.4.2020 ( referuar këtij viti). Bazuar në përllogaritjet e bëra sipas metodologjisë së përcaktuar, për pensionet që do të caktohen mbas datës 1.4.2020, pagat kontributive të të gjithë periudhës do të rriten edhe me 2,4 %. Koeficientet e indeksimit të pagave, sipas viteve, tashmë janë bërë publike dhe janë të kuptueshme për të gjithë specialistët, profesionistët apo edhe qytetarët që janë të interesuar për të përllogaritur pensionin e tyre të ardhshëm. Këto koeficiente zbatohen duke aktualizuar për vitin 2020, të gjithë pagat kontributive të vitit 2018 e përpara, përfshirë edhe pagat referuese të përpara vitit 1994", ka qartësuar zv. drejtori i ISSH- së.
PAGAT
Por si ka ndryshuar niveli i pagave për 83 profesione të para ' 94- s dhe pas këtij viti pas miratimit të koeficienteve të reja? Konkretisht, për ata që kanë pas punuar në ndërmarrjet e kohës, paga për efekt të llogaritjes së pensioneve nuk do të jetë 33 334 lekë por 39 254, pra është rritur me 920 lekë. Ose të punësuarit në ndërtim, paga për efekt pensioni nuk do të më 27 824 lekë, por 28 492, duke njohur një rritje 662 lekë. Shtesa e miratuar do të reflektohet në masën e përfitimit për ata të cilët dalin këtë vit, duke sjellë pensione më të larta. Aktualizimi i pagave mbi bazën e së cilës janë derdhur kontributet deri në vitin 1994, bëhet me koeficientin 9.302. Pas këtij viti, koeficientet janë të ndryshme. Kështu, për vitin 1995, koeficienti nga 7.311 që ka qenë, bëhet 7.486, ndërsa një vit më vonë nga 5.672, bëhet 5.808. Kjo vazhdon deri në vitin 2018, ku koeficienti i indeksimit që ka dalë nga raporti përpjesëtimor ndërmjet ngarkesës mesatare kotributive vjetore të vitit 2019 me vitin 2018, është 1.024. Për dy vitet e fundit, pra për 2019 dhe 2020, nuk aplikohet formula e indeksimit, por pagat referohen aq sa janë, të paindeksuara. Për efekt të llogaritjes së pensionit mblidhen të gjitha pagat dhe të gjithë muajt, duke dalë një pagë mesatare e rivlerësuar mujore, e cila quhet bazë e vlerësueshme.