Sot, hapja e madhe pas dy muajve karantinë, si do lëvizet dhe oraret e reja
Fasha e lëvizjes në zonat e kuqe zgjatet deri në orën 21: 00, nuk do të kërkohet më autorizim as për makinat
Për të kaluar pragun e shtëpisë, nuk do të ketë më nevojë që t'i drejtoheni portalit qeveritar për të marrë aprovimin.
Duke nisur nga sot, qytetarët mund të lëvizin lehtësisht, pa u dashur të marrin autorizim. Kjo vlen jo vetëm për këmbësorët, por edhe për automjetet. Lajmi edhe në këtë rast u dha nga Kryeministri Rama. Përmes një postimi në rrjetet sociale, në orët e vona të pasdites kreu i qeverisë prezantoi planin e ri të masave që do të hyjnë në fuqi prej kësaj të hëne.
LEHTËSIRAT
Duke nisur nga sot, Fieri është kthyer në zonë e gjelbër. Në këtë qytete, aktualisht janë 4 persona të konfirmuar pozitivë, por rreziku i transmetimit mbetet i ulët. Nëse për zonat e kuqe, fasha e lëvizjes është zgjatur nga 17: 30 që ishte deri dje deri në 21; 00, për zonat e gjelbra nuk do të ketë më kufizime. Qytetarët mund të dalin në çdo kohë, mjafton të respektojnë masat e distancimit social. Nga ana tjetër, vazhdon të jetë e ndaluar hyrjedalja e automjeteve në zonat e kuqe. "Miq, me heqjen e të gjitha autorizimeve të lëvizjes, ekspozimi ndaj infeksionit rritet shumë dhe barra e çdo individi për të ruajtur veten e të tjerët, gjithashtu! Ju lutem bëni më të mirën tuaj si deri tani dhe kujdes në mënyrën më të veçantë më të moshuarit e të sëmurët në familjet tuaja, të cilët duhet të vetëkufizojnë daljet maksimalisht", ka shkruar Rama në rrjetet sociale. Ndryshime do të bëhen edhe në raport me mediat. Kryeministri paralajmëroi dje rishikim të aktit normativ për heqjen e ndalesës së studiove për të ftuar jo më shumë se një person. "Do të mbetet vetëm kushti që të ftuarit të vendosen në distancë 2m nga njëritjetri". Sa u takon personat që riatdhesohen pas datës 18 maj, qëndrimi në karantinë për një periudhë 2- javore do të jetë detyrues ." Masa 14- ditore për të vetë k ar anti n ua rit nuk ndryshon dhe shkelja e saj ndëshkohet nga ligji dhe Kodi Penal". Kujtojmë, që prej datës 4 maj është vendosur që personat që do të riatdhesohen dhe që janë me banim në zonat e kuqe të vetëkarantinohen në banesë me kushte strikte dhe nën monitorim të rreptë. Ndërsa të riatdhesuarit që banojnë në zonat jeshile do të vijojnë karantinën në strukturat akomoduese të përcaktuara. Sot ndërkohë, pas një periudhe mbi dymujore, rinisin aktivitetin baret dhe restorantet.
MANASTIRLIU
Pak ditë më parë Ministrja Manastirliu deklaroi se nëse do të vijojnë rritje të rasteve, sipas skenarëve, mund të përdoren frenat e emergjencës. "Rritja në këto shifra e rasteve të reja është maksimumi i lejuar nga skenarët tanë të hapjes. Rritja e mëtejshme do të na detyronte të ndërmerrnim hapa të menjëhershëm për të mos lejuar një valë të dytë goditëse, që do të hidhte në erë atë që është arritur deri më sot. Nëse do të vazhdohet me tendencën përkeqësuese të ditëve të fundit, do të jemi të detyruar të bëjmë hapa pas. Dhe kjo nuk është në interes të askujt. Sigurisht nuk ka vend për alarm, por jemi në një moment ku kërkohet përgjegjshmëri nga çdo qytetar. Mbrojtja e shëndetit të qytetarëve është mbi gjithçka. Ditët në vijim do të jenë vendimtare për planin e rihapjes", tha Manastirliu. Ndërkohë, pas urdhrit për rifillimin e operacioneve me planifikim, sot është parashikuar të mbyllet edhe spitali COVID- 2, duke qenë se rastet e shtrimeve në spital kanë ardhur në rënie. "Jemi në hapat e fundit për të krijuar mundësinë e optizimizimit të strukturës së ish- kirurgjive në QSUT, në rast se do të nevojitet për trajtimin e pacientëve me COVID. Aktualisht, forcat janë përqendruar në QSUT. Jemi duke menduar mbylljen e COVID- 2 nga data 18 maj. Ndërkohë që struktura e COVID- 3 do të jetë shumë shpejt gati, për të përqendruar në QSUT trajtimin e pacienteve. Pavarësisht se kemi ulje në numra, të gjithë strukturat e shëndetësisë janë në gatishmëri", tha më herët Manastirliu. Këtë javë rinisin aktivitetin baret dhe restorantet pas një periudhe mbylljeje më shumë se dymujore.