“E vështirë për ta kuptuar, reagon Gjermania e Britania”
Ambasadori gjerman: "Duhej dialog dhe transparencë" Ambasada britanike: "Shqetësim për episodet e dhunës"
Shembja e Teatrit Kombëtar krijoi një zhgënjim te disa nga selitë më të rëndësishme diplomatike në Shqipëri.
Kështu, ambasadori i Gjermanisë në Tiranë, Peter Zingraf, përmes një reagimi e quajti të nxituar aktin e ndërmarrë nga autoritetet shtetërore pa dialoguar më parë me artistët. "Shembja e nxituar e Teatrit Kombëtar në Tiranë agimin e ditës së sotme në atë formë që e pamë, është për mua e vështirë për t'u kuptuar. Pikërisht në situatën aktuale të jashtëzakonshme, dialogu mes qeverisë dhe shoqërisë civile, si dhe sjellja transparente e qeverisë janë veçanërisht të rëndësishme. Ky zhvillim më shqetëson edhe më shumë nisur nga konteksti i luftës kundër pandemisë së virusit corona, duke qenë se grumbullimet e njerëzve të ndodhura deri tani dhe ato të pritshme mund të sjellin hapa pas. U bëj thirrje të gjithë aktorëve për dialog dhe vetëpërmbajtje", shkroi ambasadori Zingraf. Edhe ambasada britanike në Tiranë reagoi për shembjen e Teatrit Kombëtar, duke theksuar se është thellësisht e shqetësuar nga episodet e dhunës. "Thellësisht të shqetësuar nga mundësitë e humbura për dialog mbi ndërtesën e Teatrit Kombëtar dhe episodet e dhunës në Shqipëri. Mbështesim të drejtën demokratike për të protestuar dhe u bëjmë thirrje të gjithë të përfshirëve, të garantojnë që të jenë paqësorë. Dhuna cenon parimet themelore të demokracisë", shkruhej në reagimin e ambasadës britanike.
KUNDËRSHTITË E EUROKOMISIONERËVE
Raporteri për Shqipërinë në Parlamentin Europian, David Lega, u shpreh kundër shembjes së Teatrit Kombëtar në kryeqytetin shqiptar. Përmes një reagimi në rrjetet sociale, ai i bëri apel Kryeministrit Edi Rama që të ndalë dhunën ndaj aktivistëve e artistëve të ndalë shembjen e godinës e të dialogojë me shqiptarët e me Europa Nostra. Edhe eurodeputeti Michael Gahler ( Gjermani) dhe përfaqësues për çështjet e jashtme e të zgjerimit i Grupit Parlamentar të PPE në Parlamentin Europian, kërkoi nga Kryeministri Rama që të ndalë shembjen e paligjshme të Teatrit Kombëtar. Ai bëri gjithashtu thirrje për ndaljen e dhunës ndaj artistëve e aktivistëve dhe të angazhohet në dialog me të gjitha grupet e interesuara, përfshirë Europa Nostra dhe Institutin e Bankës Europiane të Investimeve.