BE dënon mungesën e dialogut, ‘ Europa Nostra’: Ditë e trishtë për demokracinë në Shqipëri
BE: Prishja e Teatrit erdhi kur ne kërkuam dialog para një vendimi të pakthyeshëm. Keqardhje që thirrja s’u ndoq nga institucionet
Kanë qenë të shumta reagimet për aktin e shembjes së godinës historike të Teatrit Kombëtar në orët e para të mëngjesit të së dielës. Por, reagimi i parë i fuqishëm nga organizmat ndërkombëtarë ishte ai i zyrës së Bashkimit Europian në Tiranë.
Përmes një postimi në rrjetet sociale, zyra e BE në vendin tonë shprehu keqardhje që një vendim i tillë fatal për shembjen e Teatrit, erdhi në një kohë kur ata ishin duke u përpjekur për të ngritur urat e komunikimit dhe dialogut mes palëve. Delegacioni i Bashkimit Europian në Shqipëri theksoi se kishte pritur që institucionet qendrore dhe ato lokale ta kishin marrë parasysh thirrjen e tyre. “Prishja e Teatrit Kombëtar erdhi në një kohë kur ne kërkuam dialog midis autoriteteve dhe shoqërisë civile para se të merrej një vendim i pakthyeshëm. Na vjen keq që kjo thirrje nuk u ndoq nga institucionet përkatëse kombëtare dhe vendore”, thuhej në reagimin e zyrës së BE në Tiranë. Më tej, në reagim nënvizohej se situata do të monitorohej dhe përsëritej një thirrje për palët, që të qëndrojnë larg provokimeve dhe të evitojnë ndonjë përshkallëzim të mundshëm të gjendjes. “Që në orët e para të këtij mëngjesi, kemi ndjekur me shqetësim të thellë zhvillimet e situatës në terren. Ne u bëjmë thirrje palëve të tregojnë përmbajtje dhe të shmangin një përshkallëzimin të situatës”, thuhej në reagim. Këtë qëndrim të selisë së BE në Tiranë e ka përkrahur edhe komisoneria e Unionit Europian për Kulturën dhe Trashëgiminë, e cila më herët kishte shprehur gjithashtu gatishmërinë për të ndihmuar në projektet për rikonstruksionin e godinës së Teatrit, për ta sjellë atë në parametrat e duhur të sigurisë, por edhe të denjë për të dhënë apo ndjekur një shfaqje.
“EUROPA NOSTRA”
I menjëhershëm dhe i fortë ishte po ashtu edhe reagimi nga organizata europiane për mbrojtjen e trashëgimisë kulturore, “Europa Nostra”. Organizata në fjalë që e kishte listuar Teatrin Kombëtar në mesin e 7 objekteve më të rrezikuara në Europë që duhen ruajtur dhe restauruar, e cilësoi 17 majin e 2020- ës si një ditë të trishtë për kulturën, por edhe për demokracinë shqiptare. Për këtë organizatë që kishte shprehur gatishmërinë e saj për të ndihmuar në rikonstruksionin e godinës, ky moment shënon një ditë të keqe edhe për sundimin e ligjit në gjithë Europën në tërësi. “Ditë e trishtë për trashëgiminë kulturore në Shqipëri dhe Europë. Ditë e trishtë për demokracinë dhe sundimin e ligjit në Shqipëri dhe Europë. Herët në mëngjes, autoritetet shqiptare arrestuan aktivistë të shoqërisë civile dhe filluan prishjen e godinës së mbrojtur të Teatrit Kombëtar të Shqipërisë. # 7 m ë t ë r r e z i k u a r a t # JonëEuropëntonë”, shkruhej në reagimin e organizatës “Europa Nostra”.