Meta: Në kulmin e errësirës, mafia urdhëroi shkatërrimin
Kreu i shtetit: Kjo pamje do të kujtohet njësoj si kazmat e diktaturës në ' 67 mbi kishat dhe xhamitë
Shembja e Teatrit Kombëtar orët e para të mëngjesit të së dielës shkaktoi mjaft reagime të forta nga aktorët politikë në Shqipëri.
Numri një i shtetit, Ilir Meta, përmes një postimi në rrjetet sociale theksoi se me aktin e shembjes së Teatrit, i cili po mbrohej nga Aleanca për Mbrojtjen e Teatrit për më shumë se 25 muaj, ka rënë çdo iluzion i shqiptarëve për një shtet të së drejtës. Sipas Presidentit, shembja e Teatrit Kombëtar ende pa lindur dielli i ditës së diel është një krim kushtetues e ligjor i paamnistueshëm. "Pak orë më parë, në kulmin e errësirës, MAFIA urdhëroi shkatërrimin, jo vetëm të një prej monumenteve të trashëgimisë kulturore më të rrezikuara të Europës, por edhe të çdo iluzioni për ekzistencën e shtetit të së drejtës në Shqipëri. Ky është një krim kushtetues, ligjor dhe moral i paamnistueshëm", shkroi Presidenti Meta. Po kështu, kreu i shtetit e denoncoi dhe e konsideroi akt mafioz dhunën e ushtruar nga Policia e Shtetit ndaj artistëve. "Dhunimi i njëkohshëm i artistëve dhe gazetarëve është një damkë e zezë për mafien në pushtet. Kjo pamje do kujtohet njësoj si kazmat e diktaturës në ' 67 mbi kishat dhe xhamitë", vijoi kreu i shtetit më tej.
PADIA NË KUSHTETUESE Aktin për shembjen e Teatrit Kombëtar nuk e frenuan as dy paditë në Gjykatën Kushtetuese të Presidentit Ilir Meta. Padinë e parë, kreu i shtetit e bëri në korrik të vitit 2019. Ndonëse e mangët, Gjykata Kushtetuese mori në shqyrtim çështjen e prishjes së Teatrit Kombëtar. Me anë të një kërkese drejtuar Bashkisë së Tiranës, Ministrisë së Financave, Ministrisë se Kulturës, Këshillit të Ministrave dhe Kuvendit të Shqipërisë, Gjykata Kushtetuese kërkoi koment me shkrim nga ato institucione për projektin mbi teatrin e ri. Sipas nenit 32 të ligjit për Gjykatën Kushtetuese, shqyrtimi në seancë plenare bëhet me pjesëmarrjen e të gjithë gjyqtarëve të Gjykatës Kushtetuese, por në asnjë rast të jo më pak se të dy të tretave të tyre. Për shkak se Gjykata Kushtetuese edhe sot është e paplotë, shqyrtimi i padisë së kreut të shtetit nuk u bë. Ndërkohë, Presidenti Meta ktheu për rishqyrtim dy herë ligjin e posaçëm të miratuar nga Parlamenti, por në fund dekreti i Metës u rrëzua nga Parlamenti.
PADIA E DYTË Presidenti Ilir Meta iu drejtua më 9 maj 2020 për të dytën herë Gjykatës Kushtetuese, për të mos lejuar shembjen e godinës së Teatrit Kombëtar. "Kam depozituar kërkesën për shfuqizimin e ligjit që i kalon në pronësi Bashkisë së Tiranës Teatri Kombëtar. Me prishjen e Teatrit synohet të zhduket trashëgimia kulturore. Gjykata Kushtetuese është ajo që duhet të vendosë sa më shpejt për pezullimin e këtyre akteve normative, që janë antikushtetuese. Bashkitë janë përgjegjëse për zhvillimin, mbrojtjen dhe promovimin e vlerave të trashëgimisë kulturore. Duke qenë se pasuria që kalon në pronësi të bashkisë ka emërtim Teatri Kombëtar, kjo bashki nuk mund të shprehet për çështje që kalojnë kompetencën e juridiksionit vendor", tha Meta më 9 maj. Padia e dytë e kreut të shtetit erdhi pas vendimit të qeverisë që kaloi pronësinë e teatrit nga pushteti qendror, tek ai lokal nëpërmjet një mbledhjeje po të së njëjtës datë. Çfarë nuk pranoi Presidenti, ishte pikërisht kthimi i bashkisë në ekzekutuese të vullnetit të Kryeministrit. "Qëllimi për shkatërrimin e godinave aktuale të kompleksit të Teatrit Kombëtar është vendosur dhe urdhëruar në mënyrë të detyruar nga Këshilli i Ministrave, ndërkohë që nga kryetari i bashkisë dhe Këshilli Bashkiak mbetet vetëm që ta vendosin në ekzekutim këtë vullnet politik të qeverisë dhe Kryeministrit", tha Meta. I pyetur nëse do të zbriste në shesh për të mbrojtur Teatrin, Presidenti preferoi të dërgonte këtë mesazh të drejtpërdrejtë. "Sa i takon ndonjë karagjozi që kërkon të bëjë prova force me Presidentin apo me dikë tjetër, duhet ta kenë të qartë që Presidenti sillet me përgjegjësi maksimale, mban shënim çdo gjë dhe i ka bërë paralajmërimet e përsëritura", tha Presidenti.