Replikat mes Ramës dhe Bashës për “vijat e kuqe”, Meta: A nuk u zgjuam në diktaturë më datë 17 maj?
Basha: Shfrytëzoi pandeminë për të vjedhur dhe shembur Teatrin. Ai vjedh përditë, sillet si kriminel me njerëzit
Rritet tensioni mes Kryeministrit Edi Rama dhe opozitës pas shembjes së Teatrit Kombëtar. Dje pasdite, kryedemokrati Lulzim Basha iu kundërpërgjigj Kryeministrit Edi Rama, duke e akuzuar se është peng i kriminelëve dhe i oligarkëve.
“Rama nuk e sheh më vizën e korrupsionit dhe as vizën e dhunës. Ai është peng i krimit dhe sillet si kriminel me njerëzit. Është peng i oligarkëve dhe punon vetëm për ta. Ai vjedh përditë, shkatërron dhe varfëron shqiptarët”, shkroi Basha në “Twitter” pas intervistës së Kryeministrit Edi Rama në “News 24”, ku tha se opozita s’mund t’i vendosë vija të kuqe qeverisë. Në lidhje me këtë deklaratë të kreut të qeverisë, Lulzim Basha akuzoi Kryeministrin se në një kohë që mbylli të gjithë shqiptarët dhe i mbante me frikën e koronavirusit, vodhi para përmes tenderëve dhe shembi Teatrin Kombëtar, për të cilin një grup artistësh kishin 27 muaj që e mbronin. “Ai shfrytëzoi edhe pandeminë për të vjedhur, për të shkatërruar Teatrin, për të grabitur pasuritë publike dhe i la njerëzit pa asnjë ndihmë. Prandaj, Shqipëria duhet të shpëtojë prej këtij hajduti ordiner që bën vetëm keq. Gjithë njerëzit e ndershëm ia kanë hequr vizën”, shkroi Basha në “Tëitter”. Një ditë para protestës së dytë të thirrur nga Aleanca për Mbrojtjen e Teatrit, kryetarja e LSI- së citon Gandhin. “Mosbindja civile kthehet në një detyrë të shenjtë kur shteti bëhet i paligjshëm ose i korruptuar. Dhe një qytetar që pajtohet me një shtet të tillë, bëhet pjesë e korrupsionit dhe paligjshmërisë së tij”, shkroi Kryemadhi.
VIJA E KUQE Më 14 maj, tri ditë para se një fadromë e bashkisë së kryeqytetit të shembte godinën e Teatrit Kombëtar në orët e para të mëngjesit të së dielës, kryedemokrati Lulzim Basha zhvilloi një takim me Aleancën për Mbrojtjen e Teatrit dhe në dalje i kujtoi kreut të qeverisë që akti i shembjes së Teatrit ishte vija e kuqe. “Do të vazhdojmë t’i mbështesim me të gjitha format dhe mënyrat. Siç e kam thënë edhe më parë, çdo hap për prishjen e Teatrit Kombëtar është një akt i pastër lufte ndaj qytetarëve dhe jo vetëm ndaj artit dhe artistëve. Unë u bëj thirrje të gjithë mbështetësve të opozitës dhe çdo qytetari shqiptar, të djathtë e të majtë, që sot është në pasiguri për jetën, që sot është me tavolinë të boshatisur, që sot nuk ka me çfarë t’i ushqejë fëmijët, ta kuptojnë te Teatri Kombëtar se sot është ‘ vija e kuqe’ e përpalljes me regjimin që ju ka vjedhur dhe ju ka lënë pa bukën e fëmijëve, që ju ka lënë pa rroga në kohën e pandemisë, që ka nxjerrë zbuluar shtetin prej kartoni”, tha Basha pak ditë më parë.