Aksioni me amerikanët, kapet rrjeti i falsifikatorëve
Merrnin nga 5 deri në 10 mijë euro në varësi të destinacionit, ku përfshihej edhe Anglia. Një vit hetime bashkë me amerikanët
Një tjetër rrjet i falsifikimit të vizave për në SHBA, Kanada dhe Britaninë e Madhe është goditur dje nga Policia e Shtetit në bashkëpunim me Shërbimin Diplomatik të Sigurisë ( DSS) në Ambasadën Amerikane.
Janë ekzekutuar 15 urdhërarreste të Gjykatës Kundër Korrupsionit e Krimit të Organizuar, si dhe 7 masa sigurie "Arrest në shtëpi" e 2 të tjera "Detyrim paraqitje". Rezultatet e operacionit u bënë publike gjatë një konference për shtyp nga drejtori i Përgjithshëm i Policisë, Ardi Veliu, dhe Antonio Zamudio, agjent special, përgjegjës për hetimet kriminale me Shërbimin Diplomatik të Sigurisë në Ambasadën Amerikane në Tiranë. Prej një viti, një strukturë e posaçme speciale e Policisë së Shtetit, në bashkëpunim dhe koordinim të plotë me Shërbimin Diplomatik të Sigurisë ( DSS) në Ambasadën Amerikane, ka zhvilluar dhe kryer një hetim të përbashkët për goditjen e një grupi kriminal lidhur me kontrabandimin e qenieve njerëzore, falsifikimin e dokumenteve të udhëtimit dhe shkeljen e ligjit mbi emigracionin në SHBA, procedim ky i regjistruar në Prokurorinë e Posaçme Kundër Korrupsionit dhe Krimit të Organizuar Tiranë. Si rezultat i këtyre hetimeve dhe provave të grumbulluara, u finalizua me sukses operacioni i koduar "Crystal Eagle". Personat e dyshuar si pjesë e këtij rrjeti merrnin nga 5 mijë deri në 10 mijë euro nga personat e interesuar për të shkuar në SHBA, Kanada, në Mbretërinë e Bashkuar etj. Mes të arrestuarve janë edhe dy punonjës Policie.
RRJETI
Në kuadër të këtij operacioni të zhvilluar në gjithë vendin, u bë ekzekutimi i masave të sigurisë të lëshuara nga Gjykata Kundër Korrupsionit dhe Krimit të Organizuar, për 24 shtetas, nga të cilët 15 me masë sigurie "Arrest në burg", 7 me masë sigurie "Arrest në shtëpi" dhe 2 me masë shtrëngimi "Detyrim paraqitjeje" në Policinë Gjyqësore, konkretisht: Bukurie Ahmetaj, 57 vjeç, banuese në Tiranë, me masë sigurie "Arrest në burg"; Elvis Ahmetaj, 25 vjeç, banues në Tiranë, me masë sigurie "Arrest në burg"; Shkëlzen Avduli, 45 vjeç, banues në Tiranë, me masë sigurie "Arrest në burg"; Klajdi Llika, 24 vjeç, banues në Tiranë, me masë sigurie "Arrest në burg"; Eduart Haxhiu, 52 vjeç, banues në Tiranë, me masë sigurie "Arrest në burg"; Altin Memaj, 27 vjeç, banues në Tiranë, me masë sigurie "Arrest në burg"; Blerim Coka, 40 vjeç, banues në Kukës, me masë sigurie "Arrest në burg"; Admir Spahia, 44 vjeç, banues në Kukës, me masë sigurie "Arrest në burg"; Azem Tanushi, 37 vjeç, banues në Tiranë, me masë sigurie "Arrest në burg"; Xhelil Dauti, 60 vjeç, banues në Tiranë, me masë sigurie "Arrest në burg";
Mark Gjinaj, 56 vjeç, banues në Laç, me masë sigurie "Arrest në burg"; Juxhin Tirana, 30 vjeç, banues në Durrës, me masë sigurie "Arrest në burg"; Ilir Ferati, 34 vjeç, banues në Kukës, me masë sigurie "Arrest në burg"; Elvis Qemaj, 52 vjeç, banues në
Tiranë, me masë sigurie "Arrest në burg"; Gëzim Gjonaj, 47 vjeç, banues në Durrës, me masë sigurie "Arrest në burg". Gjithashtu, janë ekzekutuar masat e sigurisë "Arrest në shtëpi", për shtetasit Besjan Mustafa, Behar Ismailaj, Arjan Koldashi, Arselda Memaj, Besnike Tufa, Ervilma Bezati e Gëzim Breza, si dhe masat e sigurimit "Detyrim paraqitjeje" për shtetasit Drita Sadriaj e Aida Cenaj.
HETIMI
Hetimi i këtij rasti kriminal është iniciuar para një viti nga Shërbimi Diplomatik i Sigurisë ( DSS) në Ambasadën Amerikane, Tiranë. Hetimet në lidhje me këtë grup kriminal filluan pas evidentimit të një rasti të shitjes së një pasaporte të falsifikuar amerikane në Tiranë dhe më pas u zgjerua dhe u zhvillua në një hetim të madh ndaj një grupi kriminal ndërkombëtar, dedikuar kalimit të paligjshëm të kufijve shtetërorë, të falsifikimit të dokumenteve të ndryshme si karta identiteti, pasaporta, leje drejtimi, karta shëndetësore etj. Ky grup kriminal, pasi siguronte dokumente të dyshuara të falsifikuara në Shqipëri, por edhe në vende të ndryshme, si në Kosovë etj., rekrutonte persona të interesuar, me qëllim udhëtimin e tyre për në SHBA, Kanada, Mbretëri të Bashkuar etj. dhe gjithashtu u siguronte akomodimin në vende të ndryshme të BE- së, biletat e udhëtimit etj. Anëtarët e këtij grupi kriminal, dokumentet e dyshuara të falsifikuara i dërgonin me autobusë të agjencive turistike, kryesisht në Itali dhe në Gjermani dhe nga aeroportet e këtyre vendeve, shtetas të ndryshëm tentonin t'i përdornin dokumentet e falsifikuara, me qëllim destinacionin e tyre final SHBA, Kanada, Mbretëri e Bashkuar etj.