Zbardhet takimi i opozitës me ambasadorët e BE
Ambasadorët i kërkojnë opozitës të mos braktisë Reformën Zgjedhore
Ambasadorët e vendeve të Bashkimit Europian i kanë kërkuar PD- së dhe aleatëve të saj që të mos tërhiqen nga Këshilli Politik për Reformën Zgjedhore. Opozita e bashkuar zhvilloi dje paradite një takim, që zgjati më shumë se dy orë në selinë e PD- së, me ambasadorët e vendeve të BE- së dhe me ambasadorin e Bashkimit Europian, Luigi Soreca, ku sipas burimeve nga brenda mbledhjes, diplomatët janë shprehur se pavarësisht që shembja e Teatrit në këtë kohë ishte e nxituar, është e rëndësishme që opozita të jetë e ftohtë dhe të mos tërhiqet nga Këshilli Politik për Reformën Zgjedhore. “Sado e turbullt që të jetë situata, kjo është e vetmja mënyrë për ta zgjidhur. Pjesëmarrja e opozitës duhet të vazhdojnë në Këshillin Politik”, janë shprehur ambasadorët. Po ashtu, sipas të njëjtave burime, mësohet se kryedemokrati Basha ka informuar ambasadorët në lidhje me situatën politike dhe paligjshmëritë në aktin e shembjes së Teatrit. Në përfundim të takimit me diplomatët, kreu i selisë blu konfirmoi angazhimin e opozitës së bashkuar për të vijuar Reformën Zgjedhore, por duke theksuar se nuk do të qëndrojë në Këshill për fasadë. “Zgjedhjet e lira dhe të ndershme janë një nga pikat e angazhimit tonë edhe me artistët. Po të shikoni kontratën që kemi firmosur me Aleancën për Mbrojtjen e Teatrit, ku pa diskutim ndër pikat kryesore është rindërtimi i Teatrit dhe çuarja para drejtësisë së atyre që bënë këtë krim barbar, një pikë tjetër është edhe garantimi i zgjedhjeve të lira e të ndershme. Prandaj, ne do të bëjmë gjithçka që kemi në dorë për të garantuar një proces zgjedhor, ku shqiptarët të mund të shprehin vullnetin e tyre dhe një orë e më parë t’u drejtohen kutive të votimit për t’i dhënë fund kësaj krize politike dhe krizës ekonomike që ka shkaktuar një qeveri e falimentuar, e dështuar dhe një Kryeministër i babëzitur, një Kryeministër, i cili edhe në kohën e pandemisë e ka mendjen të vjedhë, të batërdisë dhe të sillet si një kriminel ordiner. Ne nuk mund të jemi fasadë e procesit”, ka deklaruar Basha.
KËRKESAT Në tryezën e takimit nuk kanë qenë vetëm ambasadorët, të cilët kanë pasur kërkesa për opozitën. Kryedemokrati Basha, në fjalën e tij për mediat, tha u ka kërkuar diplomatëve të vendeve të BE- së që të kërkojnë prej shteteve të tyre të alokojnë më shumë ndihma për Shqipërinë. “Shqipëria, për shkak të vendimeve të Edi Ramës për t’i çuar paratë edhe në kohë pandemie te një grusht oligarkësh me afera korruptive dhe jo te njerëzit në nevojë, si rezultat i kësaj shumica dërrmuese e shqiptarëve gjenden në kushte pamundësie ekstreme. 50% e popullsisë para pandemisë ishte në kushte varfërie, tani kjo përqindja ka shkuar pothuajse 7 në 10 familje shqiptare, të cilat e shohin veten e tyre në zgrip, në humnerën ekonomike. Në këtë kuadër, duke i falënderuar për atë ndihmë që i kanë rezervuar Shqipërisë në kuadër të gjithë solidaritetit për Ballkanin Perëndimor, kam kërkuar që pranë qeverive të tyre të bëjnë apel që të shikojnë mundësinë e rritjes së mbështetjes ekonomike për vendin”, vijoi Basha. Ndërkohë, i pyetur nga gazetarët nëse do të dalin sot në protestën e dytë të thirrur nga Aleanca për Mbrojtjen e Teatrit, kreu i selisë blu tha se opozita nuk do të mungojë në asnjë prej tyre. “Opozita do të jetë në krah të çdo proteste. Natyrisht, do të jemi në krah edhe të protestës së nesërme”, ka pohuar Basha. Pikërisht për protestën, por edhe për të koordinuar lëvizjet politike me aleatët, kreu i opozitës e zhvilloi takimin me aleatët edhe një orë më tepër pasi ikën ambasadorët.