“Europa Nostra”, letër BE për Teatrin: Dënojmë shembjen

“Kërkojmë nga ministrat e BE të insistojnë në rëndësinë e kulturës dhe trashëgimisë brenda procesit të zgjerimit të Bashkimit Europian”

Aleanca për Mbrojtjen e Teatrit ka publikuar dje një letër që presidenti i organizatës europiane për mbrojtjen e trashëgimisë kulturore “Europa Nostra”, Hermann Parzinger, i ka dërguar kryetares së Këshillit të Ministrave të BE për shembjen brutale të Teatrit Kombëtar në Tiranë.

Letra e “Europa Nostra”- s: Në prag të mbledhjes ( përmes video- konferencës) të Këshillit të Ministrave të BEsë, në të cilën Ministrat e Kulturës të BE- së pritet të miratojnë konkluzionet e Këshillit mbi “Nxitjen e bashkëpunimit europian në lidhje me trashëgiminë kulturore në rrezik”, ju bëjmë thirrje që të transmetoni te të gjithë anëtarët e Këshillit të BE- së dënimin tonë më të fortë për shembjen brutale të Teatrit Kombëtar në Tiranë që u zhvillua dje. Siç mund ta dini, një aleancë e madhe e përbërë nga artistë, intelektualë, ekspertë të trashëgimisë dhe aktivistë të shoqërisë civile kanë luftuar – për disa vjet tani – për ruajtjen ( me rinovim të nevojshëm) e Teatrit Kombëtar në Tiranë. “Europa Nostra” ka shprehur mbështetjen e tyre për këto përpjekje qysh në vitin 2018, gjatë Vitit Europian të Trashëgimisë Kulturore dhe ka përcjellë shqetësimet tona për prishjen e planifikuar të këtij Teatri tek autoritetet më të larta të Shqipërisë. Kohët e fundit, Teatri Kombëtar në Tiranë është përfshirë në listën e vitit 2020 të 7 vendndodhjeve më të rrezikuara në Europë. Kjo u bë publike më 24 mars 2020 bashkërisht nga “Europa Nostra” dhe nga partneri ynë i paçmuar Instituti Europian i Bankës së Investimeve. Komisioni Europian – përmes Komisionerit të BE, Mariya Gabriel, ka shprehur gjithashtu mbështetjen e tij për mbrojtjen e të gjitha vendeve të përfshira në Listën tonë, përfshirë Teatrin Kombëtar në Tiranë. Pas përshkallëzimit të rrezikshëm të situatës së javës së kaluar të shkaktuar nga transferimi i përgjegjësisë për Teatrin në Bashkinë e Tiranës dhe një vendim për prishjen e Teatrit – marrë pas dyerve të mbyllura – nga Këshilli Bashkiak i Tiranës, “Europa Nostra” bëri një deklaratë publike duke kundërshtuar çdo përpjekje për prishjen e një ndërtese emblematike të vendosur në ansamblin historik të mbrojtur në qendër të Tiranës dhe të mbështetur nga ekspertë e aktivistë të shoqërisë civile. Komisionerja e BE, Mariya Gabriel, të nesërmen u kërkoi autoriteteve shqiptare që të angazhohen në një dialog konstruktiv me shoqërinë civile dhe ekspertë të trashëgimisë kulturore përpara se të marrin ndonjë vendim të pakthyeshëm. Për më tepër, Presidenti i Republikës kishte parashtruar një kërkesë në Gjykatën Kushtetuese të Shqipërisë për të shqyrtuar ligjshmërinë e vendimit të Këshillit Bashkiak për prishjen e Teatrit. Në vend që të merrnin kohë për të shqyrtuar ligjshmërinë e vendimit të tyre dhe të hapnin dialogun me shoqërinë civile dhe ekspertët, autoritetet shqiptare vendosën të shfrytëzojnë ditën e fundit të masave të veçanta të urgjencës shëndetësore të ndërmarra si përgjigje për pandeminë

COVID- 19, për të shkatërruar Teatrin. Në orët e para të mëngjesit të së dielës, 17 maj, ata dërguan një numër të madh policësh për të rrethuar Teatrin dhe për të arrestuar rreth 30 artistë dhe aktivistë të shoqërisë civile, që kanë mbrojtur teatrin 24/ 24 orë në ditë për dy vitet e fundit. Ata gjithashtu kanë dërguar buldozerë për të prishur brutalisht teatrin: jo vetëm që ata fshinë dhe shndërruan në rrënoja një bazë të rëndësishme të historisë së hershme të Tiranës si kryeqytet i Shqipërisë, por edhe të gjitha objektet dhe arkivat që formonin një pjesë të kujtesës së këtij institucion i rëndësishëm kulturor. “Europa Nostra”, Zëri europian i Shoqërisë Civile i përkushtuar ndaj Trashëgimisë Kulturore, dëshiron të përcjellë te Ministrat e Kulturës së BE- së shprehjen e dënimit tonë të fortë për këtë akt brutal.