Varhelyi: Edi Rama duhej të kishte evituar konfrontimin me qytetarët
Komisionerin për Zgjerimin e Bashkimit Europian, Oliver Varhelyi, thotë se një shtet nuk mund të përjashtojë grupet e interesit në konsultim e vendimmarrje për çështje si ajo e Teatrit. Në një bisedë që Varhelyi ka pasur ditët e fundit me Kryeministrin Edi Rama, pas shembjes së Teatrit, i ka theksuar shefit të qeverisë shqiptare se duhej të ishte evituar konfrontimi i qytetarëve me Policinë. Deklaratat e Varhelyi u bënë dje në Komisionin e Jashtëm të Parlamentit Europian, ndërsa diskutohej për Buxhetin e Partneritetin Lindor. Michael Gahler, Eurodeputet ( PPE, Gjermani), koordinator për Çështjet e Jashtme e të Zgjerimit, i Grupit Parlamentar të Partisë Popullore Europiane dhe koordinator i tij në Komisionin e Jashtëm, i drejtoi këtë pyetje komisionerit për Zgjerimin: “Shkatërrimi i Teatrit Kombëtar nga Kryeministri Edi Rama, a është për ju edhe shkatërrim i shanseve të Shqipërisë për negociata dhe për t’iu bashkuar Europës?”. Komisioneri Varhelyi në përgjigjen e tij theksoi se vërtet çdo shtet vendos vetë për teatrot e monumentet, por jo duke përjashtuar aktorët e rëndësishëm, por duke i përfshirë të gjitha grupet e interesit në konsultim e vendimmarrje. “I thashë Ramës në telefon se duhej ta kishte evituar konfrontimin dhe të kishte shmangur veprime të tilla”, mësohet të jetë shprehur komisioneri për Zgjerimin, Oliver Varhelyi. Komisioneri ka folur dhe në lidhje me negociatat për Shqipërinë dhe Maqedoninë Veriore. Varhelyi u shpreh se raporti vjetor do të dalë në vjeshtë, ndërsa shton se mund të vijohet normalisht me reformat e mëtejshme. “Unë kam konfirmuar sot se kornizat e bisedimeve për Shqipërinë dhe Maqedoninë e Veriut do të vazhdojnë në qershor, ndërsa raporti vjetor pritet që të prezantohet në vjeshtë. Kështu që reformat e mëtejshme mund të vazhdojnë dhe parashikimet janë të mira, duke iu përmbajtur rregullave të Covid- 19. Momenti i zgjerimit për shtetet e Ballkanit Perëndimor vazhdon”, shkruan Komisioneri i Zgjerimit.