Ambasadorja e SHBA: Duhet të përshpejtohet vetingu
"Shqipëria e SHBA duan që Reforma në Drejtësi të ketë sukses"
Ambasadorja e Shteteve të Bashkuara të Amerikës në Tiranë, Yuri Kim, kërkon që procesi i vetingut të përshpejtohet, në mënyrë që Reforma në Drejtësi të ecë përpara.
Kim thekson se ashtu si Shqipëria, edhe SHBA duan që Reforma në Drejtësi të ketë sukses. Për këtë arsye, ajo ka zhvilluar një bisedë me kryetaren e Komisionit të Pavarur të Kualifikimit, Genta Tafa Bungo, dhe përmes një postimi në "Twitter" shprehet se të dyja kanë rënë dakord për përshpejtimin e procesit të vetingut. Yuri Kim, përmes postimit të saj, shprehet se Reforma në Drejtësi duhet dërguar përpara. "Institucionet e vetingut kanë një nga rolet më të vështira, por të rëndësishme. Unë fola me kryetaren e KPK- së, Genta Tafa Bungo, për të shprehur falënderime për guximin dhe këmbënguljen e tyre. Ne u pajtuam që vetingu duhet të shpejtohet. Shqipëria dhe SHBA duan që Reforma në Drejtësi të ketë sukses", shkruan ambasadorja amerikane, Yuri Kim, në postimin e saj në "Twitter". Disa ditë më parë, gjatë një interviste për "Euronews", Kim u shpreh se Reforma në Drejtësi është absolutisht e nevojshme. "Në vitin 2016, kërkesa popullore për
Reformën në Drejtësi ishte aq e madhe, sa politikanëve iu desh t'i miratonin ato. Dhe bënë gjënë e duhur. Është për t'u përgëzuar. Reforma në Drejtësi ka tri pjesë: duhet kuadri ligjor, ngritja e kapaciteteve institucionale për të, dhe së fundi, çka mund të ndodhë edhe njëkohësisht, duhet të zbatohet ligji dhe institucionet duhet të funksionojnë. Mendoj se njerëzit kanë të drejtë që janë disi të paduruar për këtë. Kemi parë që u bë pjesa e parë. Kemi ligjet e vitit 2016. Kemi pjesën më të madhe të institucioneve të ngritura, përveç Drejtorit të Byrosë Kombëtare të Hetimit dhe Gjykatës Kushtetuese, e cila është diçka madhore. I përmend të gjitha këto për të vënë në pah se pavarësisht sa të paduruar jemi, ka pasur edhe përparim real", shprehet Yuri Kim.