KPK vlerëson tre prokurorë për Prokurorinë e Posaçme
Këshilli i Lartë i Prokurorisë konfirmoi dje tri emrat e prokurorëve që do të jenë pjesë e Prokurorisë së Posaçme Kundër Korrupsionit dhe Krimit të Organizuar, SPAK. Nga vlerësimi i anëtarëve të KLP, prokurorët Sotir Kllapi, Dritan Prençi dhe Vladimir Mara dolën fitues për tri vendet vakante dhe do të kryejnë betimin para Presidentit të Republikës më 21 maj. Dy prej prokurorëve kanë qenë të komanduar aty prej disa muajsh me kërkesë të drejtuesit Arben Kraja. Në garë morën pjesë katër prokurorë, ku prokurori Sotir Kllapi u vlerësua me 174 pikë; Dritan Prençi me 171 pikë dhe Vladimir Mara me 168 pikë. Prokurorët Prençi dhe Mara punojnë aktualisht si të komanduar në SPAK. Këshilli i Lartë i Prokurorit s'kualifikoi prokuroren Dorina Bejko, e cila arriti të merrte vetëm 158 pikë. Pas përzgjedhjes së 3 kandidatëve, numri i prokurorëve të Prokurorisë së Posaçme shkoi në 12, ndërkohë që 3 vende konsiderohen ende vakante. Për plotësimin e tyre, mësohet se ka disa kandidatë të tjerë, por që ende nuk kanë kaluar në procesin e vetingut. Për këtë, mësohet se KLP po pret përfundimin e seancave nga Komisioni i Posaçëm për prokurorët Anton Martini, Manjola Kajana dhe Elisabeta Imeraj, e cila është në pozicionin e drejtueses së Prokurorisë së Tiranës. Emrat e tyre janë zgjedhur si fitues për garën që do të zhvillohet për vendet vakante në Prokurorinë e Posaçme ose SPAK. Prokurorët Anton Martini dhe Manjola Kajana e kaluan shkallën e parë të vetingut, por Kajana u apelua nga Komisioneri Publik. Ndërsa prokurorja Elisabeta Imeraj nuk është përballur ende me Komisionin e Pavarur të Kualifikimit. Ndërkohë, kujtojmë që Prokuroria e Posaçme për ndjekjen penale dhe hetimin e veprave penale të korrupsionit, krimit të organizuar dhe çështjeve penale sipas nenit 135, paragrafi 2, të Kushtetutës janë të pavarura nga Prokurori i Përgjithshëm. Prokuroria e Posaçme ushtron ndjekjen penale dhe përfaqëson akuzën në emër të shtetit para gjykatave të Posaçme për veprat penale: Çdo vepër penale e kryer nga grupi i strukturuar kriminal, organizata kriminale, organizata terroriste dhe banda e armatosur, sipas përcaktimeve të Kodit Penal.