Plani i masave, ja si lehtësohet lëvizja
Plani i masave lehtësuese që ka nisur prej fillimit të kësaj jave parashikon heqjen e kufizimit të lëvizjes në zonat e gjelbra, ku është shtuar edhe Qarku i Fierit. Nga ana tjetër, fasha orare e lëvizjes në zonat e kuqe është zgjatur deri në orën 21: 00 për lëvizjen dhe aktivitetet e biznesit. Prej së hënës, po ashtu janë hequr të gjitha autorizimet për lëvizjen e këmbësorëve dhe automjeteve gjatë javës, ka nisur zhvillimi i procesit mësimor për maturantët, janë hapur muzetë, bibliotekat, arkivat, si dhe janë hapur bare/ restorante vetëm në ambiente të hapura. Me rëndësi është gjithashtu rifillimi i operacioneve me planifikim dhe rikthimi në normalitet i shërbimeve të tjera mjekësore.
Nga 1 mijë mjekë dhe infermierë që kanë kryer testin e gjakut, 8% prej tyre kanë rezultuar që e kanë kaluar koronavirusin.
Prej fillimit të kësaj jave, Ministria e Shëndetësisë ishte treguar e rezervuar në dhënien e informacioneve mbi numrin e testeve të kryera. Një ditë më parë ishte vetë ministrja Manastirliu, e cila tha se deri tani janë 1 mijë personel shëndetësor që e kanë kryer këtë analizë dhe 8 për qind e tyre kanë krijuar antitrupa, pra janë të mbrojtur. “Kemi vijuar me testimet e serologjisë për evidentimin e krijimit të antitrupave te grupet e riskut. Janë më shumë se 1 mijë personel shëndetësor, të cilët kanë kryer analizën serologjike. Rreth 8% e tyre kanë krijuar antitrupa, pra rezultojnë 8% që kanë IGG pozitive”. Testet serologjike shërbejnë për të kuptuar nëse kemi qenë të infektuar apo jo. Pas stafeve mjekësore, këto teste do të shtrihen në popullatë për të pasur një panoramë të saktë të sulmit të këtij virusi në popullatë.
RASTET E REJA Për të parën herë që nga fillimi i epidemisë, numri i rasteve të reja është ulur në 1. Pra, në 24 orët e fundit ka rezultuar pozitiv me COVID- 19 vetëm një person. E qetë paraqitet situata edhe në spital, ku vijon të mos ketë shtrime të reja prej disa ditësh. Sipas ministrisë, në Spitalin Infektiv aktualisht janë 15 persona, 3 prej të cilëve në terapi intensive. “Gjatë 24 orëve të fundit kemi të konfirmuar vetëm 1 rast pozitiv në Tiranë, nga 177 testime të kryera për të dyshuar të prekur me COVID- 19. Të shëruar janë 15 qytetarë. Në Spitalin Infektiv, gjendja paraqitet e qëndrueshme prej ditësh, me 15 pacientë të shtruar dhe vetëm 3 prej tyre në terapi intensive. Prej më shumë se dy javësh, fatmirësisht nuk kemi asnjë humbje jete”. Në të gjithë vendin janë infektuar 949 qytetarë. Prej tyre, rreth 78% janë të shëruar. “Në vendin tonë, aktualisht janë 176 persona aktivë me COVID- 19. Edhe pse situata paraqitet e kontrolluar, vetë qytetarët duhet të tregohen të kujdesshëm, duke respektuar distancimin fizik, duke ruajtur higjienën personale, duke shmangur vizitat te të afërmit”, ka apeluar Ministria e Shëndetësisë. Tirana, Kruja dhe Durrësi mbeten qytetet që kanë edhe numrin më të lartë të të infektuarve.
TESTIMET Nga Laboratori i Virologjisë në ISHP, Manastirliu tha se pas rihapjes do të intensifikohen testet. Numri i ulët i tamponëve ka ngjallur në mënyrë të vazhdueshme polemika. Të dhënat tregojnë se jemi të fundit në Europë që bëjmë më pak teste për 1 milionë banor. Pavarësisht alibisë së ngritur, që kjo është pjesë e strategjisë së ekspertëve, duket se mungesa e kiteve ka diktuar numrin e ulët të testeve. Dje, sipas ministrisë, fondit të ISHP- së i janë shtuar 11 mijë kite. “Ajo çfarë është e rëndësishme është se ky Laborator do të vijojë të ofrojë të njëjtin standard dhe do të jetë edhe në vijim i furnizuar, pasi çfarë kemi bërë deri sot është që kemi qenë në një linjë me strategjinë e miratuar dhe me të gjitha rekomandimet e strukturave ndërkombëtare. Çfarë duhet tashmë nga ky moment dhe në vijim është forcimi i kapaciteteve të Laboratorit të Institutit të Shëndetit Publik për të vijuar dhe për të pasur testime, për të gjurmuar dhe për të izoluar çdo rast të dyshuar”, tha Manastirliu, e cila bëri apel që në këtë fazë të rihapjes të rritet vigjilenca e strukturave, për të mundësuar në kohë reale testimin e rasteve, gjurmimin dhe izolimin, në mënyrë që të kemi parandalim dhe kufizim të përhapjes së virusit.