Pensionet, emrat që marrin shtesën e re
ISSH miratoi dje përfituesit e rinj të pensionistëve që marrin shtesën e pensionit. Gazeta boton 432 emrat në Tiranë e rrethe, deri në 20% më shumë pension
Janë 432 pensionistë nga radhët e minatorëve, naftëtarëve dhe metalurgëve që kanë gati shtesën e re. Instituti i Sigurimeve Shoqërore ka publikuar dje emrat e përfituesve në Tiranë dhe rrethe.
“Ka arritur në 12,742 numri i përfituesve nga ligji nr. 29/ 2019 ' Për trajtimin financiar suplementar të punonjësve të industrisë së naftës dhe të gazit e të punonjësve që kanë punuar në metalurgji'. Për periudhën 12- 18 maj 2020 u shtuan dhe 432 përfitues. Vazhdon puna me ritme të shpejta për mbylljen me sukses të këtij procesi, në mënyrë që gjithkush të marrë shërbimin e merituar", ka bërë me dije ISSH- ja. Mbi bazën e ndryshimeve ligjore, shtesa varion nga 12 deri 20 për qind mbi masën e pensionit. Efektet e ligjit për trajtimin me pensione suplementare të minatorëve, naftëtarëve dhe metalurgëve kanë nisur që nga data 5 korrik të vitit të kaluar, kjo do të thotë që bashkë me shtesën e muajit maj, pensionistët do të marrin edhe shtesën e 9 muajve të kaluar. Këtë shtesë mbi pension e përfitojnë të gjithë personat, që kanë jo më pak se 6 vite në profesionet dhe punët e përcaktuara të vështira dhe shumë të vështira. Gjithsej, nga të dhënat zyrtare mësohet se janë rreth 23 400 pensionistë, që përfitojnë nga skema e re suplementare. Rritja për minatorët është me 1 për qind për çdo vit pune në nëntokë, ndërsa për naftëtarët dhe metalurgët me 0.6 për qind. Në këtë mënyrë, sa më shumë vite pune, aq më i lartë do të jetë edhe përfitimi. Krahas kësaj është ulur edhe pragu kontributiv. Kështu, për të marrë pension të plotë, këto tri kategori mjafton të kenë 30 vite pune dhe jo 37 sa kërkohen aktualisht.