Meta u prezanton ambasadorëve planin për përshpejtimin e integrimit
Presidenti Ilir Meta organizoi dje një takim pune me ambasadorët e të gjithave vendeve të Bashkimit Europian, të akredituar në Tiranë, si dhe me ambasadorin e delegacionit të BE- së, Luigi Soreca. Në fokus të takimit, sipas njoftimit të shpërndarë nga zyra e shtypit të Presidencës, ishte menaxhimi i situatës së krijuar nga COVID- 19, integrimi, shembja e Teatrit Kombëtar, por edhe përmbyllja e Reformës Zgjedhore. Fillimisht, kreu i shtetit bëri me dije se falënderoi për asistencën që BE dhe vendet anëtare kanë dhënë për Shqipërinë, për të përballuar situatën e krijuar nga pandemia COVID- 19. Presidenti Meta ripërsëriti mirënjohjen për vendimin e Këshillit Europian të 25 marsit për çeljen e negociatave të anëtarësimit për Shqipërinë dhe Maqedoninë e Veriut. Ndërkohë, në njoftimin e shpërndarë për mediat, thuhet se Presidenti Meta i njohu ambasadorët me platformën e tij të datës 8 prill 2020, të propozuar të dyja palëve, me qëllim arritjen e një emëruesi të përbashkët në dobi të përshpejtimit të nisjes së negociatave të anëtarësimit me BE- në. Presidenti Meta shprehu keqardhjen për reagimin destruktiv sipas tij të qeverisë, me provokimin e panevojshëm të tensionit shoqëror dhe politik në vend. Gjithashtu, bëhet me dije se Presidenti trajtoi në takimin me ambasadorët çështjen e shembjes së Teatrit Kombëtar, duke dënuar gjithashtu edhe sjellje jo proporcionale të Policisë me protestuesit. “Kreu i Shtetit shprehu gjithashtu shqetësimin se shkatërrimi i dhunshëm dhe i paligjshëm i ndërtesës së Teatrit Kombëtar dhe sjellja shproporcionale e Policisë ndaj qytetarëve, që tronditën jo vetëm opinionin publik vendas por nxitën dhe një zinxhir reagimesh të miqve ndërkombëtarë të Shqipërisë, kanë shkaktuar një dëm të pamerituar ndaj procesit të integrimit europian të vendit”, thuhet në njoftimin e shpërndarë nga Presidenca. Por një pjesë të rëndësishme të këtij takimi të Metës me ambasadorët zuri edhe çështja e Reformës Zgjedhore, ku sipas Metës, prioritare mbeten 15 kushtet e vendosura nga Bundestagu. “Presidenti Meta vuri në dukje rëndësinë që ka përfundimi sa më parë i Reformës Zgjedhore në Këshillin Politik dhe miratimi i saj në Parlament, sipas rekomandimeve të OSBE/ ODIHR, edhe pse në kushtet e thyerjes së mëtejshme të besimit ndërmjet palëve. Kreu i Shtetit përsëriti thirrjen për çdo aktor institucional për t’u angazhuar në mënyrë konstruktive në detyrimet që ka për zbatimin e secilit prej 15 prioriteteve të BE që kushtëzojnë procesin e negociatave të anëtarësimit”, shkruhej në njoftimin e zyrës së Presidentit.