Betohen para Presidentit Meta tre prokurorët e rinj të SPAK
U betuan dje në Presidencë tre anëtarë të rinj të Prokurorisë së Posaçme kundër Korrupsionit dhe Krimit të Organizuar: Sotir Kllapi, Vladimir Mara dhe Dritan Prençi. Ambasadorja e SHBA në Tiranë, Yuri Kim, duke uruar 3 prokurorët e rinj të SPAK, theksoi se progresi në Reformën në Drejtësi duhet të përshpejtohet hap pas hapi. “Urime 3 prokurorëve për betimin e tyre sot para Presidentit Ilir Meta për promovimin në Prokurorinë e Posaçme. Progresi në Reformën në Drejtësi duhet të përshpejtohet hap pas hapi. Presim SPAK”, shkruan ambasadorja Kim. Pas ekzekutimit të himnit kombëtar dhe leximit të vendimeve të Këshillit të Lartë të Prokurorisë, duke vendosur dorën mbi Kushtetutën e Shqipërisë, prokurorët u betuan para Presidentit të Republikës, Ilir Meta: “Betohem solemnisht se gjatë kryerjes së detyrës do t’i qëndroj kurdoherë besnik Kushtetutës së Republikës të Shqipërisë, ligjeve në fuqi dhe do të respektoj rregullat e etikës profesionale!”. Teksa i uroi suksese dhe punë të mbarë prokurorëve të rinj të Prokurorisë së Posaçme kundër Korrupsionit dhe Krimit të Organizuar, Presidenti u kërkoi të nisnin menjëherë nga puna dhe të zhvillojnë hetime në mënyrë efikase, profesionale dhe të pavarur, ashtu siç duhet të funksionojnë të gjitha institucionet qeverisëse të sistemit të drejtësisë. Me këtë rast, Presidenti i Republikës apelon për të gjithë përfaqësuesit e sistemit të drejtësisë që të përmbushin detyrën e tyre në mënyrë efikase, profesionale dhe të pandikuar nga çdo ndërhyrje e brendshme apo e huaj, si dhe t’i qëndrojnë përherë besnik vetëm Kushtetutës dhe ligjeve në respekt të saj.