Basha: Gati për lista të hapura, maxhoritar të pastër

Kryedemokrati Lulzim Basha deklaroi dy ditë më parë se PD- ja është gati për të pranuar ndryshimin e sistemit zgjedhor. I pyetur nga gazetarët, kreu i PD- së u shpreh se sistemi që do të propozonte është ai maxhoritar i pastër, me lista të hapura. Megjithatë, çdo ndryshim nuk do të ndryshonte asgjë nëse në Këshillin Politik nuk do të pranohet qeveria kujdestare. Basha tha se opozita nuk ka besim që Kryeministri të jetë organizues i zgjedhjeve. “Ne do të jemi gati për lista të hapura dhe ndryshim sistemi. Ju e dini idenë time për maxhoritar të pastër dhe dy dhoma, për kufizimin e mandateve të deputetëve, Kryeministrit, por asgjë nuk do të ketë kuptim sa kohë që kujdestare e zgjedhjeve është hajdutja e zgjedhjeve dhe hajduti i zgjedhjeve, Edi Rama”, tha kryedemokrati Basha. Ndërkohë, ende nuk dihet se kur do të kthehet opozita e bashkuar në tryezën e reformës. Mbledhja e fundit e Këshillit Politik u zhvillua javën e kaluar. Prej tri ditësh, PD- ja dhe aleatët nuk kanë dhënë ende një përgjigje për ftesën e bërë nga përfaqësuesi i Partisë Socialiste, Damian Gjiknuri, për t’u rikthyer në tryezën e diskutimit për përfundimin e draftit të dakordësuar. Opozita e bashkuar u tërhoq nga tryeza politike për Reformën Zgjedhore pas aktit të shembjes së Teatrit Kombëtar. Edhe pse burime nga opozita e bashkuar thonë se PD- ja dhe aleatët do të vijojnë të marrin pjesë në Këshillin Politik, deri tani nuk ka pasur asnjë përgjigje ndaj letrës së Damian Gjiknurit. Ky i fundit tha se në mbledhjen e radhës do të miratojnë punën e bërë sa i përket çështjes së periudhës zgjedhore dhe financimit të partisë.