Gjykata Kushtetuese s'e zgjidh dot krizën politike në Kosovë
Thaçi akuzon Kurtin: Kërcënimin e "gardës” e shkroi vetë
Qeverisja në Kosovë është në varësi të një vendimi të Gjykatës Kushtetuese, por kriza e krijuar me palëve, kryesisht Kryeministrit në detyrë Albin Kurti, ish- partnerit qeveritar LDK dhe Presidentit Hashim Thaçi, nuk pritet të përfundojë.
Vendimi i Gjykatës Kushtetuese për mandatarin nuk do të zgjidhë problemet në skenën politike. Problem mbetet mospërcaktimi i afatit, brenda të cilit partia e parë duhet t'i përgjigjet kërkesës së Presidentit për emrin e kandidatit për Kryeministër. Sipas njohësve të Kushtetutës, Gjykata nuk mund të interpretojë diçka që nuk është e shkruar në aktin më të lartë juridik, si çështja e afatit. Kushtetuta nuk përcakton asgjë për afatin e përgjigjes dhe Gjykata nuk mundet që me aktgjykim ta tejkalojë normën kushtetuese. Sipas ekspertëve, Gjykata Kushtetuese nuk mund ta përcaktojë afatin në asnjë mënyrë, sepse Kushtetuta nuk është Kod Penal të sanksionojë afate, brenda të cilave palët duhet t'i kryejnë obligimet e tyre ndaj ligjit. Sipas jurisprudencës së Gjykatës Europiane për të Drejtat e Njeriut në Strasburg, afati kohor i pranueshëm definohet ajo kohë që është mjaft e nevojshme, e përshtatshme për të bërë gjithçka që kërkohet të bëhet, sa më shpejt që rrethanat e lejojnë. Nga Lëvizja Vetëvendosje janë të bindur se Kushtetuesja do të vendosë të favor të tyre. Mosdërgimin e emrit të kandidatit të ri për Kryeministër nga Vetëvendosje pas disa kërkesave, Presidenti Hashim Thaçi e cilësoi refuzim, duke kërkuar nga LDK- ja emrin e mandatarit. Avdullah Hoti nga LDK- ja, po ashtu është i bindur se do të marrë qeverinë në dorë dhe po përgatit programin. Acarimi mes palëve ka arritur deri në kërcënime nga grupe vullnetare.
Të mërkurën, Kryeministri Albin Kurti ka akuzuar Presidentin Thaçi për kërcënimet që ka marrë, duke thënë se ato vijnë pikërisht në kohën kur Thaçi është në panik. Drejtori i Institutit të Kosovës për Drejtësi, Ehat Miftaraj, dhe kryetarja e Komisionit për Çështje të Sigurisë dhe Mbrojtjes, Fatmire MullhaxhaKollçaku nga Vetëvendosje, i kanë marrë shumë seriozisht kërcënimet nga Kurti, duke premtuar një hetim për të zbuluar se kush qëndron pas tyre. Ndërsa zëdhënësi i PDK- së, Avni Bytyçi, kërkoi që situata të trajtohet me seriozitet dhe hetime për t'u kuptuar nëse ishte sajesë nga Kurti, apo kërcënim i vërtetë. Ai e cilësoi ' Gardën Vullnetare Shqiptare' një grup të padëgjuar më parë, duke ngritur edhe dyshime se kjo mund të jetë një sajesë e Kryeministrit në detyrë për të ndjellë panik e pasiguri te qytetarët, duke e shfrytëzuar këtë rast edhe për t'i kërcënuar e frikësuar gjyqtarët e Gjykatës Kushtetuese.
Disa ditë më parë, Kryeministri në detyrë i Kosovës, Albin Kurti, e kishte ftuar Presidentin e Kosovës, Hashim Thaçi, që të ballafaqohen në një debat televiziv. Thaçi tha se debati me të do të ishte zbavitës. Ftesa e Kurtit erdhi pasi Thaçi në një debat e quajti Vetëvendosjen organizatë kriminale. "Do ta zhvilloja një debat shumë relaksues dhe mund të them shumë zbavitës", ka thënë Thaçi. Më tej, Presidenti deklaroi se komunikata kërcënuese e ' Gardës Vullnetare Shqiptare' është e shkruar nga vetë Kurti në selinë e partisë së tij. "Komunikata e Gardës Vullnetare shqiptare është shkruar nga vetë Kurti dhe në selinë e partisë së tij. Gjithçka buron nga selia e partisë së tij, nga ai personalisht dhe njerëzit përreth tij", akuzoi Thaçi.