Konfirmohet shefi i ri i CIA- s, njihet për mbështetjen ndaj shqiptarëve
Senati i Shteteve të Bashkuara të Amerikës ka konfirmuar John Ratcliffe si shefin e ri të Inteligjencës. Kongresisti nga Teksasi u konfirmua në Senatin e ndarë me 49 vota pro. Ai pati edhe 44 senatorë kundër. Këtë pozitë deri tani e mbante Richard Grenell, si ushtrues detyre. Grenell, që është edhe ambasador i SHBA- së në Gjermani, është njëkohësisht i dërguar special i SHBA- së për dialogun Kosovë- Serbi. Vetë Grenell e ka uruar menjëherë Ratcliffe. "Urime Ratcliffe, do të jesh drejtori më i mirë i Inteligjencës Kombëtare ndonjëherë", ka shkruar Grenell.
Trump fillimisht zgjodhi Ratcliffe vitin e kaluar si shefin e Agjencisë së Spiunazhit, pas marrjes në pyetje agresive të ishkëshilltarit special, Robert Mueller, mbi hetimin ndaj lidhjeve të Trump me Rusinë dhe ndërhyrjes së Rusisë në zgjedhjet presidenciale amerikane dhe vendimi i Trump për të riemëruar Ratcliffe këtë vit erdhi pasi ai ishte një mbrojtës kryesor i Presidentit gjatë procedurave të impeachment- it në Dhomën e Përfaqësuesve.
Ratcliffe njihet për lidhje të forta me komunitetin shqiptar në SHBA. Më 2016, ai kishte qenë i pranishëm dhe kishte mbajtur fjalë rasti në cilësinë e të ftuarit të veçantë në "Forumin Ekonomik Mbarëkombëtar të Diasporës Shqiptare" në Nju Jork, i organizuar nga rrjeti shqiptaro- amerikan. Në disa takime të tjera shihen fotografi të Ratcliffet me Pandeli Majkon, ministër i Shqipërisë për Diasporën, dhe me Fatmir Mediun, ishministër i Mbrojtjes në Shqipëri. Takime me të kanë pasur edhe zyrtarë nga Kosova, përfshirë deputetë të Kuvendit të Kosovës. Kongresisti Ratcliffe është mik i afërt edhe me biznesmenë shqiptarë në Amerikë.