Përplasja për zgjedhjet pas thirrjes së ndërkombëtarëve dhe Presidentit, palët nisin negociatat për pakt të ri
KOMISIONERI VARHELYI: GJITHEPERFSHIRJA ESHTE E VETMJA RRUGE PER ZGJEDHJET
Rama: PS e ka gjithë vullnetin të bëjë çdo përpjekje për ta bindur PDLSI- OP për dobinë që nisma kushtetuese ka për Shqipërinë dhe unë jam i gatshëm të shkoj vetë në Këshillin Politik këtë herë, ku po erdhi dhe LB apo edhe IM nëse dëshirojnë, do jetë edhe më mirë pa dyshim. Gati që të hënën
Këshilli Politik për Reformën Zgjedhore rikthehet në tryezën e bisedimeve të hënën në orën 11: 00, për të diskutuar ndryshimet kushtetuese të propozuara nga 28 deputetët e opozitës parlamentare. Madje, këtë herë pjesë të tryezës së Reformës Zgjedhore do të jenë edhe përfaqësues të lartë të partive politike. Nga maxhoranca do të jetë i pranishëm Kryeministri Rama, ndërsa nga opozita e bashkuar nuk do të shkojë kryedemokrati Basha, por sekretari i përgjithshëm, Gazment Bardhi. Aktori që nxiti palët për t’u ulur në dialog këtë herë ishte Presidenti Ilir Meta, pas përplasjeve të forta në distancë mes maxhorancës dhe opozitës së bashkuar. Dje, Presidenti Ilir Meta njoftoi se në mesnatën e së enjtes kishte zhvilluar një bisedë me ekspertin zgjedhor, Kristaq Kume. Ky i fundit, siç bëri me dije Presidenti, ishte shprehur se çdo ndryshim që prek Kodin Zgjedhor duhet të kalojë përmes Këshillit Politik të Reformës Zgjedhore. I nxitur nga biseda me ish- kreun e KQZ- së, Presidenti Meta kërkoi një takim me kryedemokratin Lulzim Basha, për të konfirmuar gatishmërinë e opozitës së bashkuar për t’u riulur në tryezën e Reformës Zgjedhore. Pas takimit, kreu i shtetit bëri me dije se Basha i kishte pohuar se opozita e bashkuar u qëndron deklaratave se është e gatshme për të diskutuar për çështje të tjera që përcaktojnë rregullat e lojës, por në fillim duhet miratuar dokumenti i dakordësuar. E gatshme për t’u riulur në tryezën e Reformës Zgjedhore ishte edhe Partia Socialiste. Kryeministri Rama, përmes një postimi në “Tëitter” ditën e djeshme, propozoi që të ndryshonte formati i tryezës së Këshillit Politik duke propozuar që të takohej me kryedemokratin Basha, madje edhe me Presidentin Meta. Por kryetari i PD- së refuzoi një takim të tillë dhe në vend të tij konfirmoi se do të dërgojë sekretarin e PDsë, Gazment Bardhin.
NEGOCIATAT
Ilir Meta: Dje në mesnatë mora një mesazh nga një intelektual i nderuar si prof. Kristaq Kume. Shqetësimi i tij ishte se duhej bërë çdo përpjekje për të shmangur ndryshime kushtetuese të njëanshme, sepse do të ishte një kosto shumë e rëndë për vendin. Ai sugjeronte se çdo ide për ndryshime nga marrëveshja e 5 qershorit duhet të shkonte përsëri në tryezën e Këshillit Politik. Sot në mëngjes, pa gdhirë mirë, i kërkova takim z. Basha për të parë a ishte i hapur për një ide të tillë. Ai më njohu me qëndrimin zyrtar të Partisë Demokratike dhe opozitës së bashkuar, që është bërë publik dhe u është njoftuar të gjithë partnerëve të shqetësuar për të ardhmen europiane të vendit tonë. Jam i bindur se ka shumë intelektualë dhe qytetarë që ndajnë këtë shqetësim si të prof. Kumes. Për këtë arsye, po e ndaj me të gjithë ju këtë qëndrim tepër të përgjegjshëm dhe bashkëpunues të opozitës së Bashkuar.
Edi Rama: PS- ja nuk ka asnjë obligim ndaj PD- LSI, përveç marrëveshjes së 5 qershorit, të cilën do ta mbështesë deri në fund. Por, nëse opozita presidenciale ( OP) mendon se nisma zyrtare kushtetuese ia vlen të diskutohet në Këshillin Politik, PS s’ka si të jetë kundër, madje me gjithë OP në tryezë. PS e ka gjithë vullnetin të bëjë çdo përpjekje për ta bindur PD- LSI- OP për dobinë që nisma kushtetuese ka për Shqipërinë dhe unë jam i gatshëm të shkoj vetë në Këshillin Politik këtë herë, ku po erdhi dhe LB apo edhe IM nëse dëshirojnë, do jetë edhe më mirë pa dyshim. Gati që të hënën”.
Opozita e bashkuar: Rikonfirmojmë se i qëndrojmë marrëveshjes së 5 qershorit dhe apelit të përsëritur të partnerëve strategjikë për miratimin e saj sa më parë në Kuvend, pa asnjë ndryshim dhe pa ndryshime kushtetuese të njëanshme. Ndryshimet kushtetuese, të hartuara në mënyrë të njëanshme nga Partia Socialiste, jashtë Këshillit Politik dhe pas dakordësisë së 5 qershorit, prishin marrëveshjen e arritur mes palëve. Këto ndryshime kushtetuese të njëanshme bien ndesh edhe me traditën 30vjeçare të miratimit të rregullave elektorale, që janë bërë gjithmonë me gjithëpërfshirje dhe konsensus, me qëllim rritjen e besimit të qytetarëve te zgjedhjet dhe forcimin e demokracisë pluraliste. Miratimi i Reformës Zgjedhore, gjithëpërfshirëse dhe konsensuale, është edhe kërkesë e Bashkimit Europian për hapjen e negociatave. Opozita e bashkuar ka qenë dhe mbetet seriozisht dhe në mirëbesim e angazhuar në përmbushjen e këtij objektivi madhor për vendin dhe ka dhënë kontribut real në përmbushjen e këtij kushti. Kjo arritje e përbashkët nuk duhet të zhbëhet nga interesat e ngushta politike. Marrëveshja politike e 14 janarit dhe dakordësia e 5 qershorit, të arritura me ndihmën e partnerëve strategjikë SHBA dhe BE, duhen respektuar plotësisht dhe pa ndryshime nga të gjitha palët. Sipas këtyre marrëveshjeve, çështjet e dakordësuara në 5 qershor duhet të aprovohen pa asnjë ndryshim dhe pa vonesa të mëtejshme, për të mundësuar zbatimin e dispozitave të reja zgjedhore, duke përfshirë ngritjen e KQZ- së së re dhe fillimin nga puna për zbatimin e identifikimit biometrik të zgjedhësve. Për pasojë, çdo diskutim tjetër, sipas marrëveshjes, NUK mund të vonojë apo pengojë kodifikimin e marrëveshjes së 5 qershorit, si dhe duhet të jetë në përputhje me rekomandimet dhe praktikat më të mira të OSBE- së dhe Komisionit të Venecias. Rikonfirmojmë qëndrimin tonë se nëse Partia Socialiste është vërtet e interesuar për të diskutuar mbi çështje të tjera në lidhje me Reformën Zgjedhore, ajo është e obliguar nga marrëveshja e 14 janarit dhe nga marrëveshja e 5 qershorit t’i parashtrojë ato për diskutime dhe vendimmarrje konsensuale në Këshillin Politik. Për vijimin e punës në Këshillin Politik, palët kanë dakordësuar edhe në pikën 11 të marrëveshjes së 5 qershorit. Opozita e bashkuar shpreh gatishmërinë të vazhdojë diskutimin dhe punën në Këshillin Politik për çdo temë dhe çështje që lidhet me zgjedhjet, duke nisur nga sot, por pa penguar apo vonuar miratimin pa ndryshime sa më parë të dakordësisë së 5 qershorit.
Damian Gjiknuri: Sikurse jeni në dijeni, përmes Komisionit Parlamentar për Çështjet Ligjore, Administratën Publike dhe të Drejtat e Njeriut, Kuvendi i Shqipërisë ka filluar shqyrtimin e projektligjit për ndryshime në Kodin Zgjedhor, dokument i depozituar nga një grup deputetësh të maxhorancës dhe që përmban produktin e dakordësuar në tryezën e Këshillit Politik. Gjithashtu, paralelisht përmes Këshillit për Legjislacionin dhe Komisionit për Çështjet Ligjore, Administratën Publike dhe të Drejtat e Njeriut, Kuvendi i Shqipërisë ka shqyrtuar nismën e 28 deputetëve të opozitës parlamentare, të cilët propozojnë ndryshime në Kushtetutën e Republikës së Shqipërisë që lidhen me hapjen
e listave zgjedhore dhe vendosjen e një pragu kombëtar. Duke ndjekur deklarimet e opozitës jashtëparlamentare në lidhje me procesin e shqyrtimit nga Kuvendi të propozimit të deputetëve të opozitës parlamentare, për ndryshimet në Kushtetutën e Republikës së Shqipërisë dhe me vullnetin për të ballafaquar pikëpamjet tona përmes dialogut konstruktiv, ju propozoj: Mbledhjen ditën e hënë apo të martë ( përkatësisht në 20 ose 21 Korrik, sipas disponimit tuaj), ora 11: 00, të një tryeze të Këshillit Politik me temë diskutimi ndryshimet e miratuara nga Komisioni i Ligjeve në Kushtetutën e Republikës së Shqipërisë. Duke ju informuar se në këtë mbledhje Partia Socialiste do të përfaqësohet përveçse nga unë, edhe nga kryetari Rama, ju bëj me dije se në rast dëshire, edhe prezenca e kryetarëve përkatës të opozitës jashtëparlamentare do të ishte plotësisht e mirëpritur nga ana jonë. Vendi i zhvillimit të tryezës propozoj të mbetet i njëjti, në mjediset e Pallatit të Kongreseve.
Oerd Bylykbashi & Petrit Vasili: I nderuar koleg. Në emër të opozitës, mirëpresim reflektimin tuaj për të vijuar diskutimin dhe vendimmarrjen konsensuale në Këshillin Politik për çdo çështje lidhur me zgjedhjet, siç kemi rënë dakord me shkrim në marrëveshjen politike të 14 janarit dhe dakordësinë e 5 qershorit. Paraprakisht, ju konfirmojmë se dokumenti i depozituar nga një grup deputetësh të maxhorancës dhe që përmban produktin e dakordësuar në tryezën e Këshillit Politik ( siç ju rikonfirmoni me e- mail më sipër) duhet të miratohet sa më parë e pa asnjë ndryshim dhe për këtë arsye, nuk mund të rihapet asnjë çështje që është dakordësuar aty. Për çdo çështje tjetër, ne jemi të gatshëm, në orën e caktuar nga ana juaj, si të hënën ashtu edhe të martën, pa pasur një preferencë për këtë. Presim konfirmimin tuaj për ditën që ju preferoni, duke shprehur gatishmërinë tonë për pjesëmarrjen në atë mbledhje. Në lidhje me ndryshimin e formatit të përbërjes së Këshillit Politik, nëse ju keni vlerësuar si të përshtatshme zgjerimin e përfaqësuesve të partive politike në grupin e punës së Këshillit Politik, atëherë ju bëjmë me dije se opozita e bashkuar do të përfaqësohet përveç nesh, edhe nga sekretari i përgjithshëm i Partisë Demokratike, z. Gazment Bardhi.
Bylykbashi: Ju bëjmë me dije se opozita e bashkuar do të përfaqësohet përveç nesh, edhe nga sekretari i përgjithshëm i Partisë Demokratike, z. Gazment Bardhi