PS tërhiqet nga shkarkimi i Metës: Shkeljet nuk sollën pasoja
Komisioni hetimor
Partia Socialiste është tërhequr zyrtarisht nga kërkesa për të shkarkuar Presidentin Ilir Meta përmes Komisionit Hetimor në Parlament.
Shkeljet e rënda të pretenduara nga maxhoranca socialiste 1 vit më parë, pas hetimit të bërë nga Komisioni në Kuvend, rezultuan të mos jenë në atë masë sa të aktivizojnë mekanizmin e shkarkimit të kreut të shtetit në Kuvend. Relatorja e maxhorancës në Komisionin Hetimor, Klotilda Bushka, lexoi para anëtarëve të komisionit raportin e përpiluar mbi gjithë punën kërkimore të bërë nga ky komision, ku të përfshira ishin edhe dy opinionet e Komisionit të Venecias, si ai për anulimin e datës 30 qershor për zgjedhjet lokale 2019, por edhe ai për veprimet e Presidentit në plotësimin e vakancave në Gjykatën Kushtetuese. Bushka theksoi në fjalën e saj se janë konstatuar shkelje në veprimet e Presidentit kur dekretoi anulimin e zgjedhjeve të 30 qershorit 2019 dhe në veprimet për plotësimin e vakancave në Gjykatën Kushtetuese, por sipas saj këto nuk janë të mjaftueshme për të justifikuar një kërkesë për shkarkim të Metës për seancën plenare të Kuvendit.
ZGJEDHJET “Nga analiza e provave rezultuan disa shkelje nga ana e Presidentit të Republikës, si në kuadër të ushtrimit të kompetencave për shkeljet, por edhe emërimet në Kushtetuese që analizohen në raport. Këto shkelje, referuar rrethanave e pasojave dhe fakti që komisioni nuk mund të shprehet se janë ekskluzivitet i gjykatave, janë shkelje që kanë natyrë që diktojnë marrjen e masave të menjëhershme për plotësimin e aktit kushtetueses për evitimin e situatave bllokuese, por nuk janë të mjaftueshme për të justifikuar shkarkimin e Presidentit. Kemi një shkelje për shfuqizimin e dekretit. U cenua e drejta për të zgjedhur. Kryerja e veprimeve për anulimin apo shtyrjen e zgjedhjeve cenuan edhe parimin e të drejtës së popullit për të qenë sovran dhe për të ushtruar të drejtat e tij. Sa u përket pasojave, ne arrijmë në konkluzionin që ka pasur shkelje në lidhje me anulimin e datës së zgjedhjeve, por për të analizuar çfarë pasojash sollën, është marrë në konsideratë praktika që kemi administruar edhe nga Policia e Prokuroria”, theksoi deputetja socialiste, Klotilda Bushka. Në një linjë me Bushkën ishte edhe kryetari socialist i këtij Komisioni Hetimor, Ulsi Manja, i cili theksoi se Kuvendit do t’i dërgohet një raport me qëndrimin e të dyja palëve në këtë komision, pasi relatori nga ana e opozitës, Halit Valteri, kërkoi që t’i shkohet deri në fund kësaj nisme për ta votuar shkarkimin e Presidentit Ilir Meta. Në raportin e depozituar në Komisionin Hetimor trajtoheshin të dyja fokuset e investigimit parlamentar për veprimtarinë e Presidentit, si për anulimin e zgjedhjeve të 30 qershorit, ashtu edhe për çështjen e plotësimit të vakancave në Gjykatën Kushtetuese, ku konstatimi ishte i njëjtë, pasi vërente shkelje, por jo në masën për të çuar në shkarkimin e Presidentit të Republikës.