Regjistrimi i tokave me 7501, shtyhet afati për dorëzimin e dokumenteve
Agjencia e Kadastrës: Një pjesë e qytetarëve në emigracion, afat për dorëzimin e dokumenteve edhe në muajin gusht
Qytetarët që nuk janë pajisur me titullin e pronësisë për tokën bujqësore të ndarë me 7501, do të kenë në dispozicion edhe dy muaj kohë për të dorëzuar dokumentet.
Agjencia e Kadastrës ka njoftuar dje shtyrjen e afatit me të paktën edhe një muaj për shkak se një pjesë e këtyre familjeve ndodhen në emigracion. “Në disa raste, gjatë kontakteve derë më derë në fshatrat e bregut, qytetarë të ndryshëm kanë shprehur shqetësimin e tyre që një pjesë e pronarëve momentalisht nuk gjenden në Shqipëri, pasi janë jashtë atdheut, kryesisht për arsye emigracioni. Në këto kushte, megjithë avancimin e punës tonë, kemi gjykuar që në raste të veçanta të mundësojmë shtyrjen e këtyre afateve, deri në kthimin e këtyre qytetarëve për pushimet tradicionale gjatë muajit gusht”, ka bërë me dije Kadastra. Prej muajit qershor ka nisur procesi i regjistrimit fillestar për tokat në bregdetin e jugut. Deri më tani, sipas Agjencisë së Kadastrës ka përfunduar mbledhja e dokumentacionit për rreth 3400 pasuri, nga rreth 16 mijë të tillë që do t’i nënshtrohen këtij procesi. Ligji i ri përcakton që për të marrë tapinë duhet që toka të mos jetë pronë private, të mos jetë objekt i investimeve strategjike, të mos iu jetë dhënë me qira të tretëve dhe të mos jetë zënë nga ndërtimet pa leje.
PROCESI Faza e parë është ajo e dorëzimit të kërkesës dhe çdo dokumenti tjetër që zotërohet. Në përfundim të shqyrtimit të çdo dosjeje, Agjencia do të bëjë afishimin e të dhënave. Në tabelë janë edhe datat e fillimit dhe mbarimit të kësaj faze.
Qytetarët sipas ligjit do të kenë në dispozicion 45 ditë pas afishimit të të dhënave që të bëjnë plotësimet e nevojshme apo korrigjimet nëse do të kenë kontestime. “Në vijim po paraqesim grafikun e fillimit të afishimit publik të materialit të hartuar nga ana jonë për konsultim publik për t’u dhënë mundësi qytetarëve të shprehin ankesat e tyre rreth punës së bërë nga ana jonë. Qytetarët kanë kohë deri në momentin e fillimit të afishimit publik, të depozitojnë dokumentacion që ata mendojnë se mund të jetë i nevojshëm në përcaktimin e pronave të tyre”, ka sqaruar Kadastra.
MBIVENDOSJET Sa u takon rasteve me mbivendosje, dy janë zgjedhjet që do të aplikohen nëse vërtetohet që ka qenë shteti shkak i mbivendosjes: ose do të adresohen në Gjykatë ose do t’u propozohet që ta zgjidhin konfliktin mes tyre me anë të një marrëveshje. “Për rastet me mbivendosje, nëse janë të dy të ligjshëm, pra, kanë tapi që ua kanë dhënë dy institucione të ndryshme që vepronin në mënyrë të pavarur e që s’koordinonin punën mes tyre, shanset janë dy. Ose u thuhet shkoni në Gjykatë dhe zgjidheni atje çështjen e mbivendosjes, ose merruni vesh me njëri- tjetri, gjeni një të mesme vetë dhe na e thoni”, ka bërë më herët të ditur kreu i Kadastrës, Lame. Aktualisht, regjistrimi fillestar ka nisur në tetë zona kadastrale të bregdetit të jugut, konkretisht: Palasë, Dhërmi, Vuno, Lukovë, Gjilekë, Ilias, Himarë dhe Nivicë.