Opozita e re kërkon shkarkimin e Metës
Valteri: Meta shkeli Kushtetutën, nuk futemi në pazare
Në mbledhjen e Komisionit Hetimor për shkarkimin e Presidentit Meta, pasi maxhoranca socialiste vendosi që të mos i shkonte deri në fund procedurës, minoranca parlamentare doli kundër dhe kërkoi që komisioni të dalë me përfundimin për t’i kërkuar seancës plenare shkarkimin e Metës. Relatori i opozitës, Halit Valteri, theksoi se ky komision duhet të kryejë punën për të cilën është krijuar në korrikun e vitit 2019 pas kërkesës së 55 deputetëve të PS- së. “Ky komision është ngritur një vit më parë. Janë zhvilluar dhjetëra mbledhje dhe janë marrë dëshmi, përfshirë edhe të Presidentit. Por veprimtaria e tij është si të kthehet në pikën zero, pasi nuk ishit të aftë për ta çuar drejt shkarkimit, por e kanalizuat te Kushtetuesja. Sot e zbutët dhe e çuat në çështje procedurale dhe ky komision ka dalë jashtë objektit të tij. Kush mban përgjegjësi për dështimin e punës së komisionit që po mbyllet me një turp? Ne e dimë shumë mirë eksperiencën e komisioneve parlamentare. Për atë që u ngrit komisioni, për zhdekretimin e zgjedhjeve, opozita kërkon shkarkimin e Presidentit për shkelje të Kushtetutës. Për anëtaret e Kushtetueses dhe pazaret e Ramës dhe Metës nuk i futemi”, u shpreh Valteri. Po ashtu, edhe dy deputetët e tjerë opozitarë në këtë komision, Alban Zeneli dhe Arlind Çaçani, u shprehën kundër raportit të paraqitur nga maxhoranca dhe në shenjë demonstrative u larguan nga mbledhja e komisionit, pasi sipas tyre, ajo që po ndodh nuk është gjë tjetër veçse një pazar mes Kryeministrit Rama dhe Presidentit Meta. Brenda maxhorancës në këtë Komision Hetimor nuk pati konsensus, pasi deputeti Adriatik Alimadhi doli kundër, duke theksuar se nuk është pro shkarkimit të Metës dhe mbështeti raportin e paraqitur nga maxhoranca socialiste. “Mbështes raportin e maxhorancës, jo të opozitës parlamentare. Përderisa Valteri përcaktoi qëndrimin e opozitës, dua të jap qëndrimin tim personal në këtë pikë. Veprimet e Presidentit Meta nuk sollën asnjë pasojë të rëndë në Kuvend”, u shpreh deputeti Adriatik Alimadhi në fjalën e tij.