Hapet laboratori i dytë, Manastirliu: Rrisim testimet

Numri i ulët i testimeve ka qenë një ndër shqetësimet kryesore që kanë ngritur ekspertët që nga fillimi i pandemisë. Kjo, sepse duke testuar pak, është e pamundur të kesh një panoramë të saktë të situatës reale. Krahas laboratorit të Virologjisë në ISHP, do të jetë funksional edhe laboratori në QSUT. Sipas shefit të shërbimit të Laboratorit të Mikrobiologjisë në QSUT, Andi Koraqi, ky laborator do të shërbejë për të testuar pacientët e spitaleve COVID. Ndërkohë, sipas ministres Manastirliu, duke nisur nga sot do të rritet edhe numri i tamponëve. “Pas laboratorit të referencës në Institutin e Shëndetit Publik, testimet molekulare për identifikimin e SARS- COV2 do të kryhen edhe në QSUT. Me hapjen e këtij laboratori të dytë, krijojmë baza të mira për të rritur dhe për të zhvilluar testimin, i cili, në fakt, do të vijojë të ketë një objektiv kyç: gjurmimin e rasteve dhe izolimin e tyre. Sepse ne për asnjë moment nuk e kemi humbur vëmendjen nga qëllimi primar i testimit, i cili është pikërisht gjurmimi, izolimi dhe mundësia e kufizimit dhe e ndërprerjes së zinxhirit të infeksionit. Ky laborator i certifikuar, siç e premtuam, do të rrisë kapacitetet e testimit dhe për t’iu përgjigjur strategjisë së testimit të realizuar me ekspertizën e Komitetit Teknik të Ekspertëve”, tha Manastirliu gjatë inspektimit të kryer. Laboratori i Mikrobiologjisë në QSUT do të vijojë edhe testimet serologjike për stafet mjekësore, pas Tiranës, edhe për stafet në spitalet rajonale. Aktualisht, përqindja e pozitivitetit është nën 5.5%.