Zani Çaushi tërheq kërkesën për liri me kusht: “Kam bërë 31 vite burg, jo 25”
Seanca e djeshme nën masa të rrepta sigurie, i pandehuri debat me prokuroren e çështjes në gjyq: Pse ke dhënë konferencë për shtyp?”
Në seancën që pritej të ishte përcaktuese për daljen ose jo nga burgu të kapobandës së Vlorës, Çaushi deklaroi se e tërhiqte kërkesën e tij për të fituar lirinë pas më tepër se 25 viteve që vuan dënimin.
Gjykata e Korçës duhej të vendoste dje për fatin e Myrteza Çaushit, i cili po vuan dënimin e tij në Burgun e Drenovës, por në momentin e fundit ai është tërhequr nga kërkesa e tij, çka ka bërë që çështja të pushohet duke vendosur deklarimin e papranueshëm të kërkesës. Vetë Zani Çaushi në seancë ka kërkuar t’i njihet dinamika e gjykimit, pasi sipas tij, ka bërë 31 vite burg dhe jo 25, duke deklaruar kështu se nuk do të vazhdonte më me këtë proces gjyqësor. Deklarata e Çaushit është bërë pak momente para se gjyqtari Selajdin Pysqyli të tërhiqej për të marrë vendimin, ndërsa ai ka akuzuar edhe prokuroren e çështjes se vendimi ndaj tij ishte paracaktuar, duke thënë se ajo kishte dhënë konferenca për shtyp. Në këto kushte, Gjykata e ka pushuar çështjen për ta shqyrtuar më tej, për shkak se kërkesa e Çaushit për vitet e dënimit të tij ishte jashtë objektit të këtij gjykimi.
NGA GJYQI NË GJYQ I dënuari me burgim të përjetshëm, që po vuan dënimin e tij në Burgun e Sigurisë së Lartë në Drenovë, nuk i ka lënë menjëherë ambientet e Gjykatës, duke kaluar kështu në një seancë tjetër për shkak të një procesi gjyqësor që ka hapur, me objekt shfuqizimin e masës disiplinore. Sipas informacioneve, kjo kërkesë është paraqitur pranë kësaj Gjykate më 15 qershor dhe është regjistruar me shortin e datës 16 qershor të këtij viti, ndërsa është përzgjedhur si gjyqtare Ariola Kristo. Dje është zhvilluar seanca e dytë e këtij procesi të nisur thuajse paralelisht me atë për lirinë me kusht të të fortit të Vlorës. Sjellja e mirë duket se rezulton vetëm në letra, pasi gjatë vuajtjes së dënimit, Myrteza Çaushi ka vijuar të kryejë vepra penale. Sipas Prokurorisë, i forti i Vlorës është dënuar mbi 3 herë për akuzën e “Futjes dhe mbajtjes në ambientet e burgut të sendeve të palejuara”, elemente këto që faktojnë se ai nuk është rehabilituar. Në muajin prill 2020, Myrteza Çaushi ka marrë masë disiplinore nga Drejtoria e Burgut Drenovë, për shkak të një revolte brenda në burg. Për këtë episod, në të njëjtën kohë kur ka bërë kërkesën për liri, Çaushi ka kundërshtuar edhe masën disiplinore për revoltën në burg, e cila është në proces shqyrtimi nga gjyqtarja e Korçës, Ariola Kristo. Zani Çaushi, i dënuar me burgim të përjetshëm për vrasjen e dy personave, armëmbajtje pa leje, por edhe vepra të tjera penale që lidhen me aktivitetin e bandës kriminale të Çoles, të cilën ai e drejtonte, në kërkesën e depozituar në Gjykatën e Korçës kërkoi liri duke pretenduar se ka kryer mbi 25 vite dënim, ka sjellje të mirë dhe ka për t’u kujdesur për dy fëmijët e tij të mitur.