KUSH PERFITON

Pensionet, lista e re me emrat që marrin shtesën

Vendimi i ISSH, përfundon përllogaritja e shtesës së pensionit deri në 5 mijë lekë për 270 emra të rinj. Dosjet e mbetura përfundojnë brenda gushtit

Në përfundim të llogaritjes, ISSH ka bërë publike dje emrat e rinj të pensionistëve që kanë gati shtesën dhe mund ta tërheqin atë në çdo pikë shpërndarjeje, ku marrin edhe pensionin. Gazeta boton sot listën me 270 përfituesit në Tiranë dhe rrethe.

Janë më shumë se 23 mijë minatorë, naftëtarë dhe metalurgë që përfitojnë nga skema suplementare dhe deri më tani Instituti i Sigurimeve Shoqërore ka përfunduar llogaritjen për pjesën më të madhe prej tyre. Sipas këtij institucioni, dosjet e mbetura do të shqyrtohen brenda muajit gusht. ISSH kishte shprehur angazhimin për përmbylljen e këtij procesi më herët, por për shkak të pandemisë COVID është punuar me staf të reduktuar, gjë që ka sjellë edhe vonesa.

SHTESA

Ligji “Për trajtimin suplementar të naftëtarëve, metalurgëve dhe minatorëve” përcakton që rritja të bëhet mbi bazën e kontributeve të derdhura. Nga skema suplementare përfitojnë të gjithë ata që kanë punuar në sektorë të kategorizuar të vështirë dhe shumë të vështirë dhe shtesa varion mesatarisht 3 mijë deri në 5 mijë lekë mbi masën e pensionit. Në 5 korrik skadoi edhe afati ligjor për të përfituar 11 muajt e prapambetur, çka do të thotë se pensionistët do të kenë mundësi të marrin shtesën vetëm për muajin korrik apo gushtin kur do të bëhet llogaritja, por jo muajt paraardhës.

FONDI

Këtë vit, për mbulimin e skemës janë vënë në dispozicion 14 milionë dollarë. Ligji parashikon që 5 vitet e para skema të përballohet nga buxheti i shtetit e më pas fondi do të sigurohet nga kontributet e derdhura, të cilat do të rriten me 5 për qind.