Basha, vizitë në Prishtinë: Kufijtë e Kosovës nuk negociohen
“Një nga vendimet e para si Kryeministër, heqja e taksës së Rrugës së Kombit. Akses konkret të Kosovës në portet shqiptare”
Kryetari i Partisë Demokratike, Lulzim Basha, zhvilloi dje një vizitë zyrtare në Kosovë, ku u prit nga autoritetet dhe politikanët e nivelit më të lartë në Prishtinë.
Në takimet me Presidentin Thaçi, Kryeministrin Hoti, Krye parlamentaren Osmani dhe gjithë krerët e partive kryesore në Kosovë, Basha vuri theksin në përballimin e situatës së krijuar nga pandemia COVID- 19 dhe bashkëpunimin ekonomik mes dy vendeve. Por në fokus të takimeve ishte edhe çështja e dialogut Prishtinë- Beograd, ku kryedemokrati theksoi se një raport i mirë fqinjësor është i nevojshëm, por kufijtë e Kosovës janë të panegociueshëm. ME THAÇIN Në takimin me Presidentin e Kosovës, Hashim Thaçi, Basha shprehu bindjen se përfundimi i dialogut Kosovë- Serbi do ta arrijë objektivin final për njohjen reciproke mes dy vendeve. Edhe për akuzat e ngritura ndaj Thaçit, Basha theksoi se ato nuk mund të përbaltin luftën e UÇK- së. “Pata kënaqësinë të bisedoja dhe shkëmbeja mendime me Presidentin Hashim Thaçi. Diskutuam për hapat që po hidhen në drejtim të dialogut midis Republikës së Kosovës dhe Republikës së Serbisë, që kanë qëllim dhe objektiv final njohjen reciproke. Bashkërendimi i ngushtë midis SHBA- së dhe BE- së ka qenë dhe mbetet një parakusht për suksesin e çdo iniciative në raport me stabilizimin përfundimtar dhe perspektivën europiane dhe euroatlantike të rajonit. Për sa i përket aktakuzës ndaj Presidentit Thaçi, shpreha bindjen time se luftën e UÇK- së nuk mund ta përbaltë askush. Ajo është një luftë e drejtë, për të cilën kanë sakrifikuar jetën ndër shekuj bijtë dhe bijat e Kosovës”, tha Basha ndër të tjera.
ME HOTIN Ndërkohë në takimin me Kryeministrin Avdullah Hoti, në fokus të kreut të PDsë ishte gjendja ekonomike dhe përballimi i pandemisë, ku në këtë pikë theksoi se Kosova është në pararojë me
Shqipërinë. Gjithashtu, gjatë këtij takimi, Basha shprehu edhe një herë qëndrimin e tij se një nga vendimet e para si Kryeministër i Shqipërisë do të jetë heqja e taksës në Rrugën e Kombit. Situata e rënduar e shkaktuar nga COVID- 19 është emergjente për të dyja vendet. Është e rëndësishme që situata të vendoset nën kontroll sa më shpejt, dhe për këtë Kryeministri i Kosovës më njohu me masat e fundit për decentralizimin e testimeve për COVID- 19. Përgëzova zotin Hoti për ndihmën ekonomike që qeveria e Kosovës i ka dhënë qytetarëve të saj, duke qenë vend lider në rajon për mbështetjen e ofruar ndaj qytetarëve dhe biznesit. Gjatë bisedës i shpreha Kryeministrit Hoti vlerësimin për kontributin dhe vendimmarrjen për procesin e dialogut me Serbinë. Ky dialog duhet të ketë si përfundim njohjen reciproke të Kosovës. Bashkëpunimi mes Shqipërisë dhe Kosovës nuk mund të mbetet vetëm në fjalë dhe në letra. Ai duhet konkretizuar me vepra. Dhe një nga vendimet e mia të para si Kryeministër i Shqipërisë do të jetë heqja e taksës së
Rrugës së Kombit dhe rivënia e saj pa asnjë ndalesë në shërbim të qytetarëve dhe ekonomisë së të dy vendeve”, deklaroi kryedemokrati Basha.
ME OSMANIN Ndërkaq kreu i PD në takimin me Kryeparlamentaren e Kosovës, Vjosa Osmani, theksoi rëndësinë që ka mbështetja e Shqipërisë për Kosovën në procesin e dialogut me Serbinë. Sipas Bashës, ndihma më e mirë e Shqipërisë për Kosovën është mbështetje duke respektuar pavarësinë, sovranitetin dhe duke bërë gjithçka për ruajtjen e integritetin territorial të saj.
ME PARTITË POLITIKE
Në vijim të kësaj vizitë zyrtare në Kosovë, kryedemokrati Lulzim Basha u takua edhe me gjithë liderët e partive kryesore politike në Kosovë: Ramush Haradinajn, Albin Kurtin, Kadri Veselin, Fatmir Limajn dhe me sekretarin e LDK- së, Agim Veliun. Përgjatë takimit me ish- Kryeministrin Haradinaj, Basha u ndal edhe në një çështje të rëndësishme, siç janë kufijtë e Kosovës, që sipas tij janë të panëgociueshëm pasi janë fituar me gjak. “Diskutuam për dialogun mes Kosovës dhe Serbisë, domosdoshmërinë e një koordinimi mes partnerëve tanë strategjikë, SHBA- së dhe BE- së, në këtë proces, i cili si produkt final duhet të ketë njohje reciproke mes Republikës së Kosovës dhe asaj të Serbisë. Ndamë të njëjtin qëndrim se tërësia territoriale e Kosovës, e cila u fitua me gjak, është e panegociueshme dhe e padiskutueshme”, tha Basha, ndër të tjera, pas takimit me Haradinajn.