Relacioni nxjerr zbuluar qeverinë për koalicionet
“Nisma propozon edhe heqjen e mundësisë për koalicione parazgjedhore”
Kryeministri Edi Rama dhe maxhoranca këmbëngulin se nisma e 28 deputetëve të opozitës për ndryshimin e nenit 64 dhe 68 të Kushtetutës nuk ka për qëllim heqjen e koalicioneve parazgjedhore. Por relacioni i projektligjit që është i publikuar në faqen zyrtare të Parlamentit nxjerr zbuluar qëllimin e vërtetë për moslejimin e koalicioneve parazgjedhore. “Përveç propozimit për sistemin zgjedhor me lista të hapura, nisma parashikon dhe pragun elektoral në nivel kombëtar si një përqindje të votave të vlefshme, që përbën kusht për shpërndarjen e mandateve të partive politike sipas zonave zgjedhore. Gjithashtu, referuar sistemit me lista të hapura, nisma propozon dhe heqjen e mundësisë për koalicione parazgjedhore”, thuhet në relacion. Mësohet se ky detaj i është thënë edhe Kryeministrit Rama nga opozita në Këshillin Politik, gjë e cila duket se ka zënë ngushtë edhe maxhorancën, pasi, sipas burimeve, kreu i maxhorancës ka devijuar debatin.
PROPOZIMI Rreth 10 ditë më parë, Këshilli i Legjislacionit së bashku me Komisionin e Ligjeve miratuan me 16 vota pro nen për nen propozimin e 28 deputetëve të opozitës për ndryshimin e Kushtetutës. Në draftin final, relatorët nga ana e Partisë Socialiste bënë disa ndryshime në draft. Një prej tyre ishte edhe heqja e togfjalëshit “hiqen koalicionet parazgjedhore”. Në argumentimin e saj, relatorja Klotilda Bushka tha më shumë se një javë më parë se një formulim i tillë merr kuptim negativ. Megjithatë, edhe riformulimi i ri që u miratuar heq nga teksti i Kushtetutës që të drejtën për të propozuar kandidatë për deputetë ta kenë koalicionet. Por në draftin për ndryshimin e Kushtetutës shkruhet se kandidatët për deputetë mund të propozohen nga partitë politike dhe nga zgjedhësit.
DEBATI Heqja e koalicioneve parazgjedhore kundërshtohet edhe nga eksperti e zgjedhjeve, Kristaq Kume, i cili në një intervistë pak ditë më parë për gazetën “Panorama” u shpreh se një akt i tillë cenon demokracinë. Nga ana tjetër, Kryeministri Rama mbron idenë se riformulimi i nenit 64 të Kushtetutës nuk përjashton mundësinë e koalicioneve, pasi sipas tij partitë mund të bëhen bashkë në një listë të përbashkët.