Ligjet rrëzojnë Metën për gjobat ndaj medias në kohë pandemie
Në Komisionin e Ligjeve dje është rrëzuar dekreti i Presidentit Meta, që ktheu për rishqyrtim në Kuvend kalimin në ligj të aktit normativ “Për disa ndryshime dhe shtesa në aktin normativ nr. 3, datë 15.3.2020, të Këshillit të Ministrave, ‘ Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga COVID- 19’, të ndryshuar”. Përfaqësuesi i Presidentit në komision, Bledar Dervishaj, parashtroi arsyet se pse u kthye për rishqyrtim në Kuvend akti normativ, duke u ndalur në mënyrë të veçantë në papajtueshmërinë për vendosjen e masave administrative ndëshkuese në raste mosrespektimi të protokolleve nga media. Sipas Dervishajt, me këto ndryshime mund të kemi të bëjmë me shkelje të lirisë se medias dhe lirisë së shprehjes. “Duke vlerësuar paraprakisht rolin thelbësor të medias përgjatë kësaj periudhe kur shtimi i hapësirave informuese dhe ndërgjegjësuese të qytetarëve është domosdoshmëri, ashtu si dhe angazhimin e treguar prej tyre për dedikimin e hapësirës mediatike për këtë qëllim, në krahasim me sanksionet e vendosura, rezulton se Këshilli i Ministrave me miratimin e aktit normativ, nuk ka arritur të parashikojë në mënyrë të balancuar nevojën publike për këtë normë të re në raport me sanksionin e vendosur”, tha Dervishaj. Ndërsa zv. ministrja e Shëndetësisë dhe deputetët e PS- së në komision theksuan se në këtë pikë është me më shumë rëndësi e drejta e jetës, e cila sipas tyre, bashkë me të drejtën për shëndet prevalojnë mbi çdo të drejtë tjetër njerëzore.