Vaksina e Oksfordit premtuese, rrit dukshëm imunitetin

Zbulohet edhe një trajtim i ri me proteina që eviton respiratorët

Vaksina eksperimentale ndaj koronavirusit nga Universiteti i Oksfordit është e sigurt dhe ka gjeneruar një reagim të fortë imunitar te njerëzit që janë vullnetarë për të ndihmuar në testimin e saj. Ka mundësi që një vaksinë koronavirusi të provohet se është efektive brenda këtij viti, por nuk do të jetë e disponueshme në shkallë të gjerë. Prioritet besohet se do të kenë punonjësit e sektorit të kujdesit ndaj shëndetit, të cilët janë të ekspozuar në një rrezik më të lartë për shkak të punës së tyre. Por vaksinimi i gjerë do të ndodhë brenda vitit 2021, nëse çdo gjë shkon sipas parashikimeve të shkencëtarëve. Profesoresha Sarah Gilbert, nga Instituti “Jenner” i Oksfordit, tha se ata ishin më shumë se të lumtur me rezultatet e para, të cilat treguan imunitet të mirë pas një doze të vetme të vaksinës së tyre. Rezultatet e publikuara në revistën mjekësore “Lancet” janë paraprake, me efektin e vaksinës të matur nga sasia e antitrupave dhe e qelizave T që gjeneron në gjakun e vullnetarëve - jo në ndonjë përgjigje ndaj vetë virusit. Testime në shkallë të gjerë kanë filluar në Brazil dhe Afrikën e Jugut, ku shkalla e infeksionit është ende e lartë dhe do të jetë e mundur të vlerësohet nëse individët e vaksinuar kanë më pak gjasa të marrin COVID- 19 sesa të tjerët. Vaksina, e quajtur “ChAdOx1 nCoV19” po zhvillohet me një shpejtësi të paparë. Është bërë nga një virus i gjeneruar gjenetikisht që shkakton ftohjen e zakonshme te shimpanzetë. Është modifikuar shumë, së pari, që të mos shkaktojë infeksione te njerëzit dhe gjithashtu “të duket” më shumë si koronavirus. Kjo do të thotë që vaksina ngjason me koronavirusin dhe sistemi imunitar mund të mësojë se si ta sulmojë atë. Vaksina është e sigurt, por ka efekte anësore të parrezikshme. Rreth 70 për qind e njerëzve që morën pjesë në eksperiment thanë se kishin dhimbje kokë dhe temperaturë. Megjithatë rezultatet janë premtuese. Përpjekjet po vazhdojnë në laboratorë të shumtë në të gjithë botën, në kërkim të një vaksine apo të një kure kundër COVID- 19.

TRAJTIMI ME PROTEINA Një studimi klinik sugjeron se një trajtim i ri për COVID- 19 zvogëlon numrin e pacientëve që kanë nevojë për kujdes intensiv. Trajtimi nga “Biotech Synairgen” me bazë në Southampton përdor një proteinë të quajtur “interferon beta”, të cilën trupi e prodhon kur merr një infeksion viral. Proteina thithet drejtpërdrejt në mushkëritë e pacientëve me koronavirus, duke përdorur një nebulizator, me shpresën se do të stimulojë një përgjigje imune. Gjetjet fillestare sugjerojnë që trajtimi ul shanset e zhvillimit të një sëmundjeje të rëndë të një pacienti me COVID- 19 në spital, duke evituar nevojën për përdorimin e ventilimit me 79 për qind. Pacientët kishin dy ose tri herë më shumë të ngjarë të rikuperoheshin deri në pikën kur aktivitetet e përditshme nuk komprometoheshin nga sëmundja e tyre, sipas “Synairgen”. Testimet tregojnë ulje shumë domethënëse në rastet e mungesës së frymëmarrjes midis pacientëve që morën trajtimin. Për më tepër, koha mesatare e pacientëve në spital thuhet se është zvogëluar me një të tretën tek ata që marrin ilaçin e ri, me një mesatare nga nëntë ditë në gjashtë ditë. Rezultatet nuk janë publikuar ende në një raport zyrtar, por sipas shkencëtarit që ka realizuar studimin, Tom Wilkinson, nëse testimet me këtë proteinë bëhen në shkallë të gjerë, do të jetë patjetër një “ndryshim loje” në përballjen me virusin.