Zgjedhjet në Universitetin e Tiranës, kandidatët në garë për t’i kthyer dinjitetin
Hoxha e Hafizi premtojnë rishikimin e tarifave të studimit. Sevrani synon të ndryshojë mendësinë e drejtimit të UT nga një grua
Universiteti më i madh në vend, dikur shembull për të tjerët, në katër vite u kthye në modelin se si nuk duhej udhëhequr. Përplasje, akuza e procese gjyqësore të pafundme kanë qenë kryefjala e një mandati qeverisës në Universitetin e Tiranës.
Andaj, fokusi i platformës së tre kandidatëve për rektor ka qenë i qartë. Përpara së gjithash, mësimdhënies, mbështetjes akademike, studentore e kërkimit shkencor, lipset rikthimi në normalitet. Synimi parësor i kandidatëve në zgjedhjet e dyta, që pas hyrjes së fuqi të ligjit për arsimin e lartë, është t’i jepet UTsë vendi që i takon dhe rikthimi i dinjitetit.
ARTAN HOXHA Dekani i Fakultetit të Drejtësisë mendon se ka ardhur koha që universiteti të drejtohet nga një jurist, që të fusë në shinat e ligjshmërisë UT- në, me zotimin për t’i dhënë krenarinë e dinjitetin e duhur me logon: “Për t’i kthyer dinjitetin Universitetit të Tiranës”. Në platformën e tij me premtime të realizueshme, siç shprehet Hoxha, zotohet të vërë në funksion së pari sistemin digjital, molla e parë e sherrit midis rektorit dhe pjesës tjetër administrative e akademike, përfshirë dhe atë vetë. Rishikimi i tarifave të studimit është një ndër zotimet për studentët, bashkë me mbështetjen në këshillim karriere e deri në punësim. Hoxha ka në planin e tij disa risi, si ngritja e zyrës së transferimit të teknologjisë për të mbështetur iniciativat e reja, ngritjen e inkubatorëve të biznesit, rihapjen e shtëpisë botuese të librit universitar, krijimin e klubit studentore Erasmus + dhe një bibliotekë qendrore universitare. MIMOZA HAFIZI Pedagogia e Fakultetit të Shkencave të Natyrës e cilëson UT- në një pasuri të padiskutueshme, por që sot është në ditën më të vështirë të historisë së vet. Ndaj me logon: “Së bashku për nderin dhe dinjitetin e Universitetit të Tiranës”, Hafizi garon për t’i kthyer faqe. Duke konsideruar studentët fuqinë më të madhe, sikundër Hoxha, edhe Hafizi duan t’i kthejnë në aleatët e tyre më të mirë duke premtuar rishikimin e tarifave të shkollimit për çdo program studimi. Mbrojtja e pronave është një tjetër mision i saj. “Përkundër çfarë ka ndodhur në 30 vitet e fundit, të mbrohet pa kompromis integriteti i UT dhe çdo pronë e tij, e ngritur përmes punës së pakursyer të paraardhësve tanë. Kjo trashëgimi do të konsiderohet e patjetërsueshme. Ajo është bazë për zhvillimin e vlerave të reja”, citon akademikja, duke iu referuar “betejës ligjore” për Kopshtin Botanik midis Fakultetit të Shkencave, ( pjesë e të cilit është prej dekadash) dhe bashkisë së Tiranës.
Ndërsa për trupën akademike kërkon autonomi, rritje financimi, pjesëmarrje në projekte ndërkombëtare dhe bashkëpunim mes fakulteteve me parauniversitarin. KOZETA SEVRANI “Me UT, për UT, vizion dhe integritet”. Ky është parimi, me të cilin do të udhëheqë pedagogia e Informatikës Ekonomike, që tenton të sjellë veç të tjerash edhe ndryshim në mendësinë e drejtimit të UT për herë të parë nga një grua. Ndonëse nuk e përmend ekzaktësisht fjalën dinjitet si dy të parët, Sevrani tenton që përmes qeverisjes së mirë të ruajë integritetin e vlerave akademike. Kjo është vetëm një nga tetë shtyllat e platformës bashkë me infrastrukturën, mësimdhënien, kërkimin shkencor, ndërkombëtarizimin e dixhitalizimin, sigurimi i cilësisë, studentët dhe financat. Katër vitet e kaluara, sipas Sevranit, është shpenzuar shumë kohë dhe energji në luftën mes drejtuesve, e cila duhet të ishte kanalizuar në rritjen e cilësisë së mësimdhënies.