Yllka Bilushi Stramarko, vajza e rektorit që garon për të trashëguar statusin
Në çdo përvojë, secili përpiqet të bëjë më të mirën, por kur përpara tij ka precedentë të suksesshëm, angazhimi është shumë më i madh. Yllka Bilushi, sot që kandidon si e para grua për rektore në Universitetin e Vlorës, ka gjithnjë në mend babain e saj, Vasil Bilushi, sa herë hedh një hap më shumë në karrierën e saj. Ai ka qenë referenca në gjithçka, punë akademike a shoqërore qofshin. Edhe sot që i ati nuk është më, përgjigjet e tij i ka në kokë, mjafton të pyesë veten dhe do dëgjojë zërin e tij t’i flasë. Përvoja e tij e gjatë si profesor, themelues e rektor i Universitetit të Gjirokastër, ka qenë shkollë më vete për Yllkën, por gjithnjë e ka munduar dyshimi i shprehur nën zë, ‘ A do ta bëj edhe unë aq mirë sa ai”… Familjarët e miqtë e saj, studentët gjithashtu, e dinë mirë që përkushtimi i saj është po aq serioz sa i të atit, ndaj edhe e kanë nxitur në të gjitha iniciativat që ka ndërmarrë. Sot, dita e Yllkës është më e zhurmshme se më parë. Takimet me kolegët, shkëmbimet e ideve, projektet për të zhvilluar universitetin, nuk i kanë lënë më kohë për asgjë tjetër. Yllka Bilushi Stramarko është prej vitesh përgjegjëse departamenti dhe drejtuese e Qendrës Kërkimore Shkencore, por karriera e saj nuk ka nisur me mësimdhënien. Prej natyrës energjike nuk plotësohej me një lloj rehatie që të jep profesioni i mjekut. Pas përvojës si mjeke patologe në Poliklinikën e Specialiteteve në Vlorë, nisi rrugën e re që do të ishte e gjatë, si lektore për Shëndetin Publik, në Universitetin e Vlorës. Paralelisht rritej edhe formimi saj akademik brenda dhe jashtë vendit. Në vitin 1996 ndjek specializimin në Primary Care Education, diplomohet për Trainer for General Practitioner në Universitetin e Glasgow- t, Scotland, ofruar nga Postgraduate Medical Education Board në UK. Në vitin 2003 zhvillon kurs trajnimi në Patologji Speciale dhe Edukim Profesional në Qendrën për studime ndërkombëtare FUNTAS Greqi.
Në vitin 2006, mbaron shkëlqyer shkollën pasuniversitare SHPU në Shëndetin Publik, ndërsa në vitin 2010 merr gradën Doktor i Shkencave në Shëndetin Publik. Kjo u pasua nga studime të mëtejshme postdoktorature dhe bashkëpunime në disa punime shkencore në një nga Qendrat kërkimore të Universitetit të Janinës me Prof. Triantafyllos Albanis. Karriera e Bilushit është e shpërndarë dhe e pasuruar ndër vite. Ka nisur në Universitetin e Vlorës si pedagoge për t’u bërë më pas anëtare senati, anëtare e Bordit të Administrimit, anëtare e Këshillit te Fakultetit të Shëndetit Publik, anëtare e komisioneve të ndryshme Adhoc. Ajo është anëtare e disa bordeve editoriale të revistave shkencore të indeksuara dhe konferencave shkencore brenda dhe jashtë vendit. Sot, misioni i saj i ka kapërcyer vështirësitë e misioneve të viteve të shkuar. Për herë të parë, në historinë e kolegeve të qytetit të saj, Yllka kërkon të bëjë hapin tjetër, atë që asnjë grua deri sot nuk e ka bërë, të kandidojë për rektore. Është edhe kjo një arsye mjaft e fortë pse ajo shpreson të fitojë përballë kandidatit që ka, për të përfaqësuar dhe për t’iu dhënë zë e kurajë të gjitha grave. Sapo të marrë statusin për të përfaqësuar gratë në një nga pozicionet më me integritet, do të fillojë sfidën tjetër: të ndërtojë e ruajë jo vetëm figurën e saj, por edhe atë të shkollës që përfaqëson, për t’u nderuar në sytë e babit që nuk i sheh më, por e di se si do ta shihnin nëse do ta kishte pranë vetes.