Nga “treni” i Ramës, te batutat me Vasilin, zbardhet debati 5 orë me dyer të mbyllura në Këshillin Politik
ÇFARE NDODHI DJE NE TAKIMIN PER ZGJEDHJET. KERKESAT E MAXHORANCES DHE REAGIMI I PD- LSI
Ka zgjatur gati 5 orë debati në Këshillin Politik të Reformës Zgjedhore, edhe pse palët u larguan pa asnjë ndryshim në qëndrimin e tyre.
Pas mbërritjes së delegacioneve të zgjeruara, ku opozitës parlamentare i ishte shtuar krahas Rudina Hajdarit edhe Myslim Murrizi, i fundit që erdhi në tryezën e madhe ishte kreu i PS- së, Edi Rama.
DEBATI PËR KOMISIONET
Palët në tryezë ishin të ndara në dy pjesë, edhe pse parimisht bëhet fjalë për pushtetin dhe dy opozitat. Burime brenda takimit sqaruan për gazetën se çfarë ndodhi gjatë këtyre 5 orëve. Ishte deputeti Murrizi, që riktheu edhe njëherë në tryezë debatin për komisionet zgjedhore. Ai kishte të njëjtin qëndrim me qeverinë për depolitizimin e komisioneve. Ky qëndrim i tij, që përkrahej edhe nga PS, u refuzua gjatë pjesë së parë të debatit nga anëtarët e opozitës reale. Bylykbashi i PD dhe Vasili i LSI- së i sqaruan Murrizit se ky debat ishte mbyllur më datë 5 qershor. Anëtarët e opozitës i treguan Murrizit se ishte PS që kishte refuzuar edhe propozimin e BE- së dhe në fund ishte rënë dakord edhe nga përfaqësuesja e 28 deputetëve, Rudina Hajdari. Kjo e fundit, dje mbajti një qëndrim të paqartë, edhe pse ka qenë pjesë e tryezës ku u firmos marrëveshja e 5 qershorit.
DEBATI PËR KOALICIONET
Burime nga mbledhja pohuan për gazetën “Panorama” se kreu i qeverisë, në fjalën e tij, ka bërë gjatë gjithë kohës presion ndaj opozitës së bashkuar, duke u thënë se “do t’u ikë treni”. Rama ka kërkuar që hapja e listave, dhe si rrjedhojë edhe përjashtimi i koalicioneve e pragu i zgjedhjeve nuk prekin paktin e 5 qershorit. Ka qenë Bardhi i PD- së, që i ka sqaruar Kryeministrit se këto ndryshime e prekin paktin dhe se pakti nuk negociohet më. Rama mësohet se ka insistuar, duke i rekomanduar opozitës të bëhet pjesë e zgjidhjes politike, pasi matematikisht PS i ka votat për të ndryshuar Kushtetutën, edhe pa konsensusin e tyre. Po ashtu, sipas po të njëjtave burime, kryetari i PS- së, Edi Rama, i ka kujtuar opozitës së bashkuar se ata u larguan me dëshirë nga Parlamenti, kështu që maxhoranca e ka mundësinë t’i diskutojë ndryshimet kushtetuese edhe pa ata. Ndërkohë që Kryeministri Rama i ka shprehur opozitës së bashkuar se edhe marrëveshja e 5 qershorit është bërë në mënyrë të njëanshme, duke shkelur parimin e gjithëpërfshirjes.
Në takimin që zgjati rreth 5 orë vlen të përmendet se në momentin që numri dy i PDsë ka përmendur nenet që preken në marrëveshjen e 5 qershorit nga ndryshimi i Kushtetutës, kreu i qeverisë i ka ftuar përfaqësuesit e opozitës së bashkuar që të bashkohen për të bërë edhe rregullimet në marrëveshjen e 5 qershorit në mënyrë që të mos ketë përplasje mes ndryshimeve në Kodin Zgjedhor dhe ndryshimeve në Kushtetutë.
Gjatë mbledhjes, Rama e Vasili kanë shkëmbyer batuta mes tyre. I ndërprerë disa herë nga Vasili, Kryeministri i ka kujtuar ish- aleatit se fjalët e tepërta nuk tregojnë më shumë dije. Ndërkohë që Vasili i është përgjigjur me batutën, “shkollëpaku”, të dy i kanë kujtuar njohjet e vjetra njëri- tjetrit.
KUNDËRPËRGJIGJJA
Fjalën e Kryeministrit Rama në mbledhje, përfaqësuesit e opozitës së bashkuar e kanë marrë si një ftesë për të rihapur marrëveshjen e 5 qershorit, gjë e cila është refuzuar automatikisht nga PD- LSI dhe aleatët e vegjël. Në mungesë të kryedemokratit Lulzim Basha, i cili ndodhej në një vizitë pune dyditore në Kosovë, Partia Demokratike kishte dërguar sekretarin e përgjithshëm, Gazment Bardhin. Mësohet se ky i fundit ka qenë i prerë në fjalën e tij se opozita e bashkuar nuk është e gatshme të rihapë diskutimet për marrëveshjen e 5 qershorit. Madje, sipas burimeve nga brenda takimit, numri dy i PD- së i ka kujtuar Kryeministrit Rama se përfaqësuesi i PS- së, Damian Gjiknuri, ka qenë kundër ndryshimit të sistemit gjatë diskutimeve në Rezidencën Amerikane dhe në Këshillin Politik. Bardhi ka kërkuar që të miratohet sa më shpejt marrëveshja e 5 qershorit pa ndryshime. “Kuptuam nga diskutimi i kryetarit të Partisë Socialiste që qëllimi është të rihapim edhe një herë diskutimin për përmbajtjen e marrëveshjes së 5 qershorit dhe të bëjnë ndryshime të saj. Drafti i marrëveshjes së 5 qershorit është produkt i një pune të përbashkët 6mujore, është miratuar dhe nënshkruar me konsensusin e të gjitha palëve, me mbështetjen e partnerëve ndërkombëtarë. Ne i qëndrojmë firmës sonë dhe deklarojmë që nuk mund të rishihet apo rishkruhet asnjë fjalë ndryshe. Çështjet që ju shtruat bien në kundërshtim dhe ndryshojnë marrëveshjen e 5 qershorit dhe prishin dakordësinë që ne kemi arritur aty ( nenet 19 dhe 36 të draftit të nënshtruar në zbatim të marrëveshjes së 5 qershorit)”, mësohet se ka thënë Bardhi.