COVID dhe fëmijët, Dasho: Mos i privoni nga shkolla

Në kushtet kur sistemi shëndetësor po lufton për të përballuar rastet në rritje me koronavirus, ekspertët e shëndetit publik kanë kthyer sytë nga ana sociale. Me afrimin e muajit kur shkollat duhet të rihapen normalisht, Erion Dasho apelon qeverinë që të gjejë mënyrën jo vetëm për të ruajtur shëndetin fizik të fëmijëve, por edhe atë mendor e social. Gjithë çfarë kërkohet është balanca e frenimit të përhapjes së COVID- 19, por pa penalizuar fëmijët. “Është koha që Ministria e Arsimit dhe Ministria e Shëndetësisë të ngrenë një grup ekspertësh, të cilët të analizojnë evidencat dhe të marrin vendimin se si do të funksionojnë shkollat gjatë vitit shkollor 2020- 21: në kushte normale, online apo me sistem miks. Ndonëse është shumë vonë për përgatitje të plota dhe gjithëpërfshirëse, të paktën të merren masa për të krijuar një sistem për manaxhimin e mësimit që viti i ri shkollor të mos i gjejë mësuesit shqiptarë duke përdorur rrjetet sociale për mësimdhënie”. Risku i fëmijëve ndaj koronavirusit dhe roli i tyre në transmetimin e virusit ka qenë një nga temat më të debatueshme. Por, pavarësisht debateve shkencore mbi rolin e shkollave në përhapjen e COVID- 19, Dasho thotë se sëmundshmëria dhe vdekshmëria në moshën pediatrike rezulton shumë e ulët në raport me adultët.