Shtesa e pensioneve, 8 mijë përfitues në skemë
ISSH do të përfundojë brenda dy muajve të ardhshëm llogaritjen e shtesës për ata përfitues që janë pjesë e skemës suplementare
Brenda dy muajve të ardhshëm, Instituti i Sigurimeve Shoqërore pritet të përfundojë llogaritjen e shtesës edhe për 8 mijë pensionistë të tjerë që janë pjesë e skemës suplementare.
Përgjatë kësaj periudhe, pra, nga miratimi i ligjit të ri "Për trajtimin me pensione suplementare të naftëtarëve, metalurgëve dhe minatorëve", janë marrë në shqyrtim nga ISSH mbi 16 mijë dosje. Gazeta boton sot listat e plota me përfituesit e shtesës për muajin korrik.
PËRFITUESIT Ndryshimet ligjore të zyrtarizuara dy muaj më parë zgjerojnë kategoritë përfituese duke i dhënë mundësinë një pjese të pensionistëve që u është refuzuar kërkesa në fazën e parë që të trajtohen me pensione suplementare. Janë rreth 24 mijë pensionistë që përfitojnë nga shtesa e re. Për pjesën dërrmuese, procedurat kanë përfunduar. Në proces kanë mbetur edhe rreth 8 mijë dosje, të cilat do të shqyrtohen brenda dy muajve të ardhshëm. Instituti i Sigurimeve Shoqërore më herët kishte shprehur angazhimin për përfundimin e të gjitha praktikave në muajin qershor. Por situata e krijuar prej pandemisë COVID- 19 ka sjellë ngadalësimin e procesit dhe kohëzgjatjen e tij në kohë.
KATEGORITË QË SHTOHEN Vendimi i fundit i qeverisë lidhet jo vetëm me përditësimin e listës së profesioneve, por edhe me shtimin e tyre. Pra, do të jenë më shumë pensionistë që do të përfshihen në skemë si pasojë e këtyre ndryshimeve. "VKM 447 lidhet me shtimin e profesioneve që nuk ishin parashikuar në vendimin NR. 526, datë 20.12.1958 dhe shtimin e profesioneve të personave inxhinierë teknikë që kanë punuar drejtpërdrejt në prodhim në ndërmarrjet e sistemit të naftës dhe konkretisht ato të përcaktuar në ligjin 29/ 2019 si shpim- kërkim, shpim- shfrytëzim, prodhim, sizmikë, gjeofizikë kantieriale, përpunim dhe transport me naftësjellës dhe gazsjellës", ka bërë me dije Ministria e Infrastrukturës. Edhe pse procesi i aplikimeve nuk është i limituar apo i kufizuar në afat, pensionistët që kanë dorëzuar një herë kërkesë, nuk është e nevojshme që të riaplikojnë.