Marrëveshje me Turqinë dhe Zvicrën, Meta dekreton dy ligjet
Kreu i Shtetit, Ilir Meta, dekretoi dje shpalljen edhe të dy ligjeve si ratifikime marrëveshjesh me Turqinë dhe Zvicrën. Vetëm 3 ditë pasi priti në një takim zyrtar ambasadorin e Zvicrës, Adrian Maitre Meta shpalli dekretin për ligjin që u votua në Kuvend javën e shkuar “Për ratifikimin e marrëveshjes dypalëshe ndërmjet Këshillit të Ministrave të Republikës së Shqipërisë dhe Konfederatës Zvicerane, për programin e zhvillimit rajonal në Shqipëri ( faza 4, 2019- 2023)”. Për këtë marrëveshje Meta shprehet se është një gur i rëndësishëm në mbështetjen e zhvillimit rajonal. “Konfederata Zviceriane mbetet një nga nxitësit e rëndësishëm për zhvillimin e ekuilibruar dhe të qëndrueshëm shoqëror e ekonomik të shtetasve shqiptarë, sipas politikave dhe praktikave të Bashkimit Europian. Kjo marrëveshje është një mbështetje e drejtpërdrejtë e institucioneve përgjegjëse për zhvillimin rajonal”, thuhet në njoftimin e Presidencës. Po ashtu, Presidenti dekretoi ligjin “Për ratifikimin e marrëveshjes së bashkëpunimit financiar dhe ushtarak ndërmjet qeverisë së Republikës së Turqisë dhe Këshillit të Ministrave të Republikës së Shqipërisë”. Sipas Presidentit, kjo marrëveshje reflekton vullnetin e vazhdueshëm disavjeçar të Republikës së Turqisë për mbështetjen e marrëdhënieve të qëndrueshme me Republikën e Shqipërisë, përmes kontributeve të drejtpërdrejta për Forcat e Armatosura të vendit tonë. “Nëpërmjet kësaj marrëveshjeje jepet kontribut financiar për blerjen e shërbimeve dhe mallrave për qëllime ushtarake, duke ndikuar në rritjen e mëtejshme të ndërveprueshmërisë së Forcave të Armatosura të Republikës së Shqipërisë”, theksohet në njoftim.