Hyseni: U përulem SHBA- ve për prani të përhershme në dialog
Palmer mbështeti marrëveshjen gjithëpërfshirëse mes palëve
Koordinatori i Kosovës për dialogun me Serbinë, Skënder Hyseni, ka zhvilluar një takim në Uashington me Matthew Palmer, ku tha se ka kërkuar praninë e përhershme aktive të SHBA- së në tryezën e bisedimeve ndërmjet Kosovës dhe Serbisë, në Bruksel.
Palmer është emisar Special për Ballkanin Perëndimor dhe njëkohësisht zëvendësndihmëssekretar për Europën dhe Euroazinë në Departamentin e Shtetit. Ai dha mbështetjen e SHBA- ve për një marrëveshje gjithëpërfshirëse mes Kosovës dhe Serbisë.
“Pasi theksoi se SHBAtë e çmojnë angazhimin konstruktiv të qeverisë dhe të gjitha institucioneve të Kosovës në këtë proces, Palmer theksoi se Shtetet e Bashkuara të Amerikës përkrahin dialogun në Bruksel, duke shtuar se Amerika do të jetë me ju përgjatë gjithë këtij procesi, në përkrahje të fuqishme për një marrëveshje të drejtë, të qëndrueshme dhe gjithëpërfshirëse”, ka njoftuar Hyseni. Duke kërkuar angazhim më të madh nga SHBA në proces, Hyseni tha se, “Me zotin Palmer bëmë një bisedë të hapur dhe shteruese me qëllim të koordinimit, me synimin që dialogu të marrë një dinamikë të re duke shtruar, pa u vonuar dhe pa zvarritje, për diskutim dhe akordim çështjen kryesore: marrëveshjen gjithëpërfshirëse për njohje reciproke dhe normalizim midis Republikës së Kosovës dhe Serbisë”, tha ai. “Duke konstatuar dhe theksuar se krahas BE- së, roli i SHBA- ve në këtë proces është i pazëvendësueshëm, me përulësi i kërkova zotit Palmer praninë e përhershme aktive të SHBA- së në tryezën e bisedimeve në Bruksel”. Hyseni tregoi edhe për një vizitë tjetër që pati në kohën sa po qëndron në Uashington, me përfaqësues të lartë në Shtëpinë e Bardhë. “Pas takimit me Matthew Palmer, po ashtu zhvillova një bisedë të gjatë me z. Ryan Tully, Drejtor i Lartë dhe znj. Amanda R. Ahlers, Drejtore për Europën në Këshillin për Siguri Kombëtare të Shtëpisë së Bardhë. Biseda po ashtu kishte në fokus dialogun e rinisur në Bruksel, por edhe zhvillimet e përgjithshme në Kosovë dhe rajon”, sqaroi Hyseni. Takimet e tij në SHBA u zhvilluan pas dy raundesh në nivel ekspertësh në Bruksel, ku Hyseni përfaqësoi Kosovën, ndërsa kreu i zyrës për Kosovën në qeverinë serbe, Marko Gjuriç, ka përfaqësuar Serbinë. Dialogu mes dy palëve ka rinisur më 16 korrik në Bruksel, pas 20 muajsh ndërprerje. Ishte parashikuar që rinisja të bëhej në Uashington më 27 qershor, por një akuzë e ngritur nga Prokuroria Speciale në Hagë kundër Presidentit Hashim Thaçi, që do të përfaqësonte Kosovën në bisedimet me Serbinë, u bë shkak për anulimin e këtij takimi.